Wildberries O‘zbekiston bozoriga chiqdi

^{Foto: Forbes}
Wildberries yirik xalqaro onlayn riteyleri O‘zbekistonda o‘z faoliyatini yo‘lga qo‘ydi. Bu haqida kompaniyaning matbuot xizmati xabar berdi.

Wildberries ayollar, erkaklar va bolalar kiyimlari, oyoq-kiyimlar va aksessuarlar, kitoblar, zoo mahsulotlar, texnika buyumlari va boshqa maishiy tovarlar kabi Rossiya hamda xalqaro brendlardan qariyb 20 milliondan ziyod tovarlarini O‘zbekiston aholisiga taqdim etadi. Keyinchalik mahsulotlar tanlovi kengaytirilib, kompaniya hamyonbop narxlardagi turli mahsulotlarni yetkazib beradi.

Buyurtmalarni «uz.wildberries.ru», iOS va Android uchun mo‘ljallangan mobil ilovalar orqali amalga oshirish mumkin.

«O‘zbekistonda onlayn do‘konlarimizdan biri ishga tushirilganini mamnuniyat ila ma’lum qilamiz. Mamlakat aholisi xalqaro kompaniyalarning keng tanlovdagi mahsulotlaridan foydalanish imkoniyatiga ega bo‘ladilar, mahalliy biznes vakillari esa kelajakda Wildberries kompaniyasiga qo‘shilishlari va o‘z mahsulotlarini, kompaniya faoliyat olib boradigan mamlakatlarga chiqarishlari mumkin bo‘ladi», – deb izoh beradi Wildberries matbuot xizmati.

Tovarlarni yetkazib berish kompaniyaning shaxsiy logistika xizmati tomonidan amalga oshiriladi. Bundan tashqari, O‘zbekistonda Wildberries’ning buyurtmalarni qabul qilib olish nuqtalari ham ishga tushirilib, bunga qo‘shimcha ravishda aholiga xarid qilingan kiyim-kechaklarni o‘lchab ko‘rish imkonini beruvchi kabinalar ham tashkillashtirilgan.

Onlayn riteylerning dastlabki tarqatish nuqtasi Toshkentda allaqachon o‘z ishini boshladi. O‘zbekiston tadbirkorlari Wildberries tarqatish nuqtalarini o‘zlari mustaqil ravishda ochib, tovar aylanmasidan 3,5 foizigacha foyda olishlari mumkin bo‘ladi.

Wildberries kompaniyasi bugungi kunda dunyoning 20 ta mamlakatida, shu jumladan, Rossiya, Qozog‘iston, Belarus, Germaniya, Fransiya, Buyuk Britaniya, Boltiqbo‘yi mamlakatlari, AQSH va boshqa ko‘plab mamlakatlarda o‘z faoliyatini olib bormoqda. “Zamin” yangiliklarini “Telegram”da kuzatib boring