Shavkat Mirziyoyev: «40 yil paxta bilan shug‘ullanib, odamlarni qashshoq qilib yubordik»

Prezident Shavkat Mirziyoyev Qoraqalpog‘istonga tashrifi davomida Beruniy, Amudaryo, To‘rtko‘l va Ellikqal’a tumanlari hokimlari bilan savol-javob qildi. Bu «Menimcha» ko‘rsatuvida namoyish etildi. Prezident Beruniy tumani hokimi Otabek Saparbayevning ishidan noroziligini aytdi.

«Saparbayev, seni ishdan olmasligim uchun Xudoybergenov, Muratov va Kenjayev bilan meni qanday qilib ishontira olasan? Qanday qilib ishlay olasan, 10 mingta ish joyi yarata olasan va odamlarni rozi qilasan? Men tumanga berilgan pullarni aytdim, bu kamida 100 milliard so‘m qo‘shimcha pul. Bu pulni hech qachon tushingda ko‘rmagansan. Xo‘sh, men bu pulni nega tashlab ketishim kerak?», — deya tanqidiy savol qo‘ydi Shavkat Mirziyoyev.

Hokimlar esa ishsizlikka barham berish bo‘yicha o‘z rejalarini aytib berishdi. Davlat rahbari to‘rtala hokimni eshitib, nega yoshlar balansi deb kuyunishi, nega «temir daftar»dagi raqamlarni ko‘rib yuragi og‘rishini aytdi. Shavkat Mirziyoyev ijtimoiy sohada qiladigan katta ishlar borligi va qo‘l ostidagilar ham bu og‘riqlarni o‘z tanasida his qilyaptimi, yo‘qmi, shularni so‘radi.

«Sen biz paxta bilan shug‘ullanib yurganimizda ishlamaganing uchun baxtlisan. 40 yil paxta bilan shug‘ullanib odamlarni qashshoq qilib yubordik. Tibbiyotga e’tibor bermadik, o‘qituvchilar ko‘chaga chiqib ketishdi, ‘semechka’ sotib yurishdi. O‘qituvchining oylik maoshi, kitob, maktab ta’minoti bilan shug‘ullanmadik», — dedi Shavkat Mirziyoyev.

Prezident Beruniy hokimiga «o‘zining ishongan vakili bo‘lib, sektor rahbarlari bilan o‘n ming kishi nima bo‘ladi, savoliga javob topa olsa, ishda qolishini» aytdi.

«Men gaplashgan hokim yordamchilarining ichidan hokim ham topdim. Ko‘zi yonib turibdi: biladi, o‘zini qiynaydi. Nega uni hokim qilmasligim kerak? Yosh ekan, yosh bo‘lsa bo‘laversin», — deya qo‘shimcha qildi davlat rahbari. “Zamin” yangiliklarini “Twitter”da kuzatib boring