Yulduz Usmonovadan tovon puli va davlat boji uchun jami 195 mln soʻm undirildi

Joriy yilning 16-17 mart kunlari ijtimoiy tarmoqlarda xonanda Yu.Usmonovaga oid ijro ishi boʻyicha turli xabarlar tarqatildi.

MIB matbuot xizmatining xabar berishicha, mavjud ijro ishi boʻyicha fuqarolik ishlari boʻyicha Mirzo Ulugʻbek tumanlararo sudining 29.10.2021 yildagi qarzdor Yu.Usmonovadan undiruvchi Y.Roʻziev foydasiga 50 mln. soʻm ma'naviy zarar uchun kompensatsiya, mazkur da'vo ariza bilan murojaat qilishda toʻlangan 1 mln. 80 ming soʻm miqdorida davlat boji, qonun hujjatlarida belgilangan bazaviy hisoblash miqdorining besh yuz baravari miqdorida (270.000x500=135.000.000) tovon puli, jami 186 mln. 80 ming soʻm va davlat foydasiga 5 mln. 400 ming soʻm davlat boji undirish toʻgʻrisidagi ijro varaqasiga yuzasidan qarzdor Yu.Usmonovaga nisbatan 2 ta ijro ishi Byuroning Mirzo Ulugʻbek tuman boʻlimiga 02.02.2022 yilda ijro ishi yurituviga kelib tushgan.

Ushbu ijro ishi fuqarolik ishlari boʻyicha Mirzo Ulugʻbek tumanlararo sudi tomonidan ijro ishi vaqtinchalik toʻxtatilgan edi.

Shundan soʻng, Oliy sudning fuqarolik ishlari boʻyicha sudlov hay'atining ajrimi bilan sudning 29.10.2021 yildagi hal qiluv qarori hamda Toshkent shahar sudi fuqarolik hay'atining 18.01.2022 yildagi ajrimi oʻzgarishsiz hamda kassatsiya shikoyati qanoatlantirilmasligi koʻrsatilgan.

Shunga asosan, ijro harakatlarini davom ettirish jarayonida zararni ixtiyoriy ravishda qoplash masalasi boʻyicha tushuntirish ishlari olib borilgan.

Natijada, jami 195 mln. 384 ming soʻmlik zarar, davlat boji va boshqa toʻlovlar toʻlab berilishi ta'minlandi.

Shuningdek, undirilgan zarar fuqaro Y.Roʻzievning plastik kartochkasiga oʻtkazib berilgan. Shu asosda, ijro hujjati tamomlangan. “Zamin” yangiliklarini “Telegram”da kuzatib boring