Munisa Rizaevaning “yil toʻyi” sifatida e'tirof etilayotgan dabdabali nikoh oqshomidan reportaj (foto, video)
7 sentyabr kuni “Zo‘r TV” telekanalining pavilonida xonanda Munisa Rizaevaning nikoh toʻyi boʻlib oʻtdi. Xonandaning toʻyi uchun pavilonda maxsus dekoratsiya qurildi. Ijtimoiy tarmoqlarda ushbu kecha “yil toʻyi” sifatida e'tirof etilmoqda.
Yoshlar dastlab poytaxtdagi mehmonxonalardan birida fotosessiya oʻtkazdi. Vayner Liil Xurramov fotosessiya jarayonidan videoreportaj tayyorladi. Uning aytishicha, Munisa oʻta ogʻir koʻylak kiygani tufayli uning harakatlanishiga 6 nafar qiz yordam berib turgan.
Kelin pavilonga Ozoda Nursaidovaning soʻzlari oʻzgartirilgan “Yor-yor” qoʻshigʻi sadolari ostida kirib keldi. Uni kuyovning yoniga otasi kuzatib qoʻydi.
Oʻzbekiston xalq artisti Farrux Zokirov toʻyni ochib berdi va yoshlarga baxt tiladi.
Munisa va Arseniyni tabriklash uchun oʻzbek shou-biznesining koʻplab taniqli vakillari, shuningdek rossiyalik xonanda Leonid Agutin ham tashrif buyurdi. Kelin-kuyov Agutinning xit qoʻshiqlariga yaqinlari bilan raqsga tushishdi.
