Keyt Uinslet: “Titanik” ortidan kelgan mashhurlik hayotiga salbiy ta'sir qilgani haqida

1997 yilda ekran yuzini koʻrgan “Titanik” oʻz davrining eng qimmat kino loyihalari hisoblangan. Ushbu film koʻpgina aktyor va aktrisalarni, jumladan Keyt Uinsletni ham dunyoga tanitgan. Ammo bu mashhurlik aktrisa hayotida yaxshi oqibatlarga olib kelmagan. Bu haqda u Net-a-Porter nashriga bergan intervyusida soʻzlab berdi.

^{Foto: Dzen}
"Hayotimga ommaviy axborot vositalarining aralashuvi shu qadar kuchli ediki, oʻsha paytdagi yoqimsiz hislarni eslagim yoʻq",— deydi aktrisa. "Hamma mendan nega “Titanik” dan keyin bosh rollarda suratga tushmasligimni soʻrar edi. Men esa 20 yoshimda mashhurlikka erishib, uy sotib olishga muvaffaq boʻldim. Yanada mashhurlik meni qoʻrqitar edi", — deb qoʻshimcha qildi Uinslet.

^{Foto: Pinterest}
"Bundan tashqari, odamlar meni tashqi koʻrinishim ustidan kular: “Keyt semizligidan Jekka suv ustidagi eshikda joy etmagan”, deyishardi. Biror rolga taklif etilsam, albatta vaznim haqida savol berishlari meni xafa qilardi. Natijada oʻzimga boʻlgan ishonchim kamayib, tashqi koʻrinishimdan uyalishni boshladim", — deydi aktrisa Keyt Uinslet.

^{Foto: Filmdan lavha} “Zamin” yangiliklarini “Telegram”da kuzatib boring