Sovet va rossiyalik mashhur rassom Erik Bulatov 92 yoshida vafot etdi. Bu haqda The Art Newspaper Russia nashri xabar berdi.
Erik Bulatov Sverdlovskda tug‘ilgan, ammo Moskvada ulg‘aygan. Ma’lumki, u bir necha yil davomida Nyu-Yorkda yashagan, 1990 yillardan esa hayotini Parij va Moskva o‘rtasida kechirgan.
Rassom faoliyatidagi burilish nuqtasi 1980 yillarda Syurix kunstxallasida va Parijdagi Jorj Pompidu markazida o‘tkazilgan shaxsiy ko‘rgazmalari bo‘lgan — aynan shu ko‘rgazmalar unga xalqaro shuhrat olib kelgan.
Rassomning mashhur asarlari orasida “Kirish – kirish yo‘q”, “Erkinlik”, “Yashayman – ko‘raman”, “SSSR shon-shuhrati”, “Xush kelibsiz”, “Luvr. Jokondda”, “Bulutlar o‘smoqda” kabi ishlari bor.
2008 yilda uning 1975 yilda yaratilgan “SSSR shon-shuhrati” nomli asari London auksionida ikki million dollardan ortiq narxda sotilgan edi.
Shuningdek, shu yil yoz oyida Erik Bulatov Rossiyaning eng muvaffaqiyatli zamonaviy rassomlari reytingida birinchi o‘rinni egallagani ma’lum qilingan edi.
“Zamin”ni Telegramʻda oʻqing!
