Hind kinolarining sevimli yulduzi, 42 yoshli Katrina Kaif birinchi marta ona bo‘ldi. Uning turmush o‘rtog‘i, aktyor Viki Kaushal bilan bo‘lgan juftligi 2025-yil 7-noyabr kuni o‘g‘il farzandli bo‘ldi, deb yozadi “India Today”.
Katrina Kaif bu quvonchli xabarni o‘zining Instagram sahifasida muxlislar bilan baham ko‘rdi:
“Bizning bir bo‘lagimiz, quvonchimiz dunyoga keldi! Cheksiz muhabbat va minnatdorchilik bilan o‘g‘limizning tug‘ilganini e’lon qilamiz. Katrina va Viki”, — deb yozgan aktrisa.
Viki Kaushalning ukasi Sanni Kaushal ham bu xabarni tasdiqladi. U o‘z sahifasida “Mayin chacha ban gaya” (“Men amaki bo‘ldim”) deb yozib, quvonchini muxlislar bilan bo‘lishdi.
Katrina Kaifning homiladorligi haqidagi mish-mishlar bir necha oy avval, sentyabr oyida paydo bo‘lgan edi. Juftlik bu haqda sukut saqlagan bo‘lsa-da, muxlislar aktrisaning suratlaridan va intervyularidan buni ilgari payqagan edilar.
Katrina Kaif Bollivudning eng mashhur va sevimli aktrisalaridan biri hisoblanadi. U o‘zining “Josuslar”, “Tezlik”, “Ek Tha Tiger” kabi filmlaridagi rollari orqali butun dunyoda tanilgan. 2021-yil dekabr oyida Viki Kaushal bilan Rajaston shtatidagi an’anaviy hind marosimi asosida tantanali to‘y bo‘lib o‘tgan.
Ma’lumot uchun, Katrina Kaif 1983-yilda Gonkongda hindistonlik Muhammad Kaif va ingliz millatiga mansub Syuzanna Tyurkott oilasida tug‘ilgan. U 14 yoshida modellik karerasini boshlab, 2003-yildagi “Bum” filmi orqali kinoga kirib kelgan.
Viki Kaushal esa 1988-yilda Mumbayda dunyoga kelgan. U Rajiv Gandi texnologiya institutini tamomlab, 2012-yilda “Vasseypur to‘dalari” filmi orqali ekranda debyut qilgan.
Qiziq jihati shundaki, Katrina Kaif Shohrux Xon bilan birga 2013-yilda Ginnes rekordlar kitobiga eng badavlat aktrisa sifatida kiritilgan. Uning yillik daromadi o‘sha vaqtda taxminan 10 million AQSH dollarini tashkil etgan.
“Zamin”ni Telegramʻda oʻqing!
