O‘zbekiston dunyodagi eng arzon mamlakatlar reytingiga kirdi!

Jahondagi shaharlar va mamlakatlar to‘g‘risida keng qamrovli ma’lumotlarni taqdim etuvchi Numbeo portali 2025 yil uchun global yashash darajasi reytingini e’lon qildi. Bu reytingda dunyoning 139 mamlakatida yashash qanchalik qimmat ekani aks ettirilgan bo‘lib, O‘zbekiston ushbu ro‘yxatda eng arzon mamlakatlar qatoridan joy oldi.

Mutaxassislar reytingni tuzishda turli mamlakatlarda kundalik hayot uchun zarur bo‘lgan mahsulotlar va xizmatlar narxlarini tahlil qilishdi. Xususan, ijara to‘lovlari, kommunal xizmatlar, transport xarajatlari, restoran va oziq-ovqat narxlari hamda aholining xarid qobiliyati kabi omillar hisobga olingan. Har bir mamlakatdagi yashash xarajatlari Nyu-York shahrining turmush darajasi bilan taqqoslangan holda baholandi.

Reyting natijalariga ko‘ra, O‘zbekiston 24,2 ball to‘plab, 139 mamlakat ichida 127-o‘rinni egalladi va dunyodagi eng arzon hayot kechirish mumkin bo‘lgan mamlakatlar qatoriga kiritildi. Bu O‘zbekiston aholisi uchun hayot kechirish xarajatlari boshqa davlatlarga nisbatan ancha past ekanini anglatadi.

Shuningdek, qo‘shni davlatlar ham ushbu reytingda o‘z o‘rinlarini egallashdi. Masalan, Rossiya yashash qiymati past bo‘lgan mamlakatlar orasida 132-o‘ringa joylashgan bo‘lsa, Belarus 123, Qirg‘iziston 121, Qozog‘iston 114, Armaniston esa 63-o‘rinda qayd etildi. Ammo Tojikiston va Turkmaniston turli sabablarga ko‘ra ushbu reytingga kiritilmadi.

Reytingda yashash uchun eng qimmat davlatlar sifatida AQSH Virjiniya orollari, Shveysariya, Islandiya, Bahama orollari va Singapur tilga olingan bo‘lsa, eng arzon mamlakatlar sifatida Afg‘oniston, Hindiston, Misr, Liviya va Pokiston ko‘rsatilgan.

Mazkur reyting natijalari O‘zbekistonda yashash arzon ekanligini tasdiqlab, mamlakatdagi turmush sharoitlari xorijiy turistlar va investorlarni jalb qilish imkoniyatlarini yanada oshirishi mumkin. Shu bilan birga, aholining daromadlari va xarid qobiliyatini oshirish bo‘yicha sa’y-harakatlarni davom ettirish muhimligi ham e’tirof etiladi.

Xalqaro reytinglar doimo aholining farovonligi va davlat rivojlanishining muhim ko‘rsatkichlaridan biri bo‘lib kelgan. Ushbu reytingdagi natijalar O‘zbekistonning bu boradagi xalqaro mavqeini yana bir bor ko‘rsatib berdi. “Zamin”ni Telegramʻda oʻqing!