O‘zbekistonda harbiy xizmat to‘lovlari yana oshirildi – yangi miqdor qancha?

O‘zbekistonda mehnatga haq to‘lashning eng kam miqdori oshirilishi munosabati bilan bir oylik harbiy xizmat (safarbarlik chaqiruv rezervi) uchun to‘lov summalari ham ko‘tarilmoqda. 2025 yilning 1 avgustidan boshlab bu miqdor yana 10 foizga oshiriladi va 1 mln 271 ming so‘mni tashkil etadi.

O‘zbekiston qonunchiligiga ko‘ra, bir oylik harbiy xizmat badali mehnatga haq to‘lashdagi eng kam miqdorning 7 barobariga teng qilib belgilangan. Demak, joriy yilning avgust oyidan boshlab harbiy xizmat uchun to‘lanadigan badal 8 million 85 ming so‘mdan 8 million 897 ming so‘mga oshadi. Bu esa harbiy xizmatchilarning moddiy ta’minotini yaxshilash maqsadida amalga oshirilayotgan muhim chora-tadbirlardan biridir.

Mazkur tizim mamlakatimizda 2019 yilda joriy etilgan bo‘lib, shu kungacha mehnatga haq to‘lashning eng kam miqdori muntazam oshirilib borilmoqda. Natijada harbiy xizmat to‘lovi ham shu dinamikaga muvofiq tarzda o‘sib bormoqda.

So‘nggi yillarda harbiy xizmat badali miqdorlarining o‘zgarishi quyidagicha qayd etilgan:

- 2019 yilda bu ko‘rsatkich 4 million 40 ming so‘mni tashkil qilgan bo‘lsa;
- 2020 yilda 4 million 755 ming so‘mga ko‘tarildi;
- 2021 yilda 5 million 754 ming so‘mga yetkazildi;
- 2022 yilda bu summa 6 million 440 ming so‘mgacha o‘sdi;
- 2023 yilda esa 6 million 860 ming so‘mga teng bo‘ldi;
- 2024 yilda 8 million 85 ming so‘m miqdori belgilandi.

Bir oylik harbiy xizmat to‘lovlari mamlakat mudofaa sohasida moddiy-texnik bazani mustahkamlash, harbiy xizmatchilarning ijtimoiy himoyasini yaxshilash, safarbarlik chaqiruvi rezervida xizmat qilayotgan yoshlar uchun qulay shart-sharoitlar yaratish maqsadida sarflanadi.

Fuqarolar harbiy xizmat rezerviga 27 yoshgacha qabul qilinishi mumkin. Ular bir oylik harbiy yig‘inlarda ishtirok etadilar va favqulodda vaziyatlar yoki O‘zbekiston Respublikasiga qarshi qurolli tajovuz sodir bo‘lganda harbiy xizmatga jalb qilinishi mumkin.

Harbiy xizmat uchun to‘lov badallari bir martada yoki bir yil davomida bo‘lib-bo‘lib to‘lanishi mumkin. Bu mablag‘lar Mudofaa vazirligining maxsus hisob raqamida jamlanib, ular muddatli harbiy xizmatchilarning nafaqalarini ta’minlash, safarbarlik chaqiruvi rezervi xizmatchilarining ijtimoiy sharoitlarini yaxshilash va vazirlikning harbiy-texnik ehtiyojlari uchun sarflanadi.

Yangi belgilangan harbiy xizmat to‘lovining oshirilishi mamlakat mudofaa tizimini yanada mustahkamlash bilan birga, harbiy xizmatga chaqiriladigan yoshlarning moddiy qo‘llab-quvvatlanishiga qaratilgan qadam sifatida ahamiyatga ega. Shu bilan birga, mazkur chora mamlakatning mudofaa salohiyatini mustahkamlashga va harbiy sohaning obro‘sini yanada oshirishga xizmat qiladi. “Zamin”ni Telegramʻda oʻqing!