Tashqi xavfsizlik sababli Samarkand–Isroil reysi bekor qilindi

Markaziy Osiyoning qadimiy shahri — Samarqanddan Isroilning Tel-Aviv shahriga uchishi kerak bo‘lgan aviaqatnov bekor qilindi. Air Samarkand aviakompaniyasi tomonidan berilgan rasmiy bayonotda aytilishicha, bu qaror xavfsizlik nuqtai nazaridan qabul qilingan.

Xususan, Tel-Avivdagi Ben-Gurion xalqaro aeroporti hamda unga tutash havo hududining vaqtincha yopilishi tufayli 15 iyun sanasiga rejalashtirilgan 9S 501/502 Samarqand–Tel-Aviv–Samarqand reysi amalga oshirilmaydi.

Aviakompaniya boshqa sanalarga belgilangan qatnovlar bo‘yicha alohida axborot berilishini bildirgan. Shuningdek, bekor qilingan reys yo‘lovchilari elektron pochta orqali yoki chiptalarni sotib olgan sayyohlik agentliklari va kassalarda xabardor qilinmoqda.

Agar siz ushbu reys uchun chipta xarid qilgan bo‘lsangiz, ikki imkoniyat mavjud:
- To‘liq to‘lovni qaytarib olish;
- Yoki parvozni boshqa sanaga ko‘chirish.

Ayni vaqtda mintaqadagi geopolitik tanglik sabab boshqa bir qator aviareyslar ham bekor qilingan. Jumladan,
Eronga tutash havo hududining yopilishi oqibatida 13-iyun kuni quyidagi reyslar amalga oshirilmaydi:
- Fly Dubai aviakompaniyasining Dubai–Toshkent–Dubai yo‘nalishi bo‘yicha FZ-1945/1946 reyslari;
- Air Arabia aviakompaniyasining Sharja–Toshkent–Sharja yo‘nalishi bo‘yicha G9-270/271 reyslari;
- Asia Union aviakompaniyasining Toshkent–Madina–Toshkent yo‘nalishi bo‘yicha 7Q-141/142 reyslari.

Mutasaddilar fuqarolarni chiptalar bilan bog‘liq masalalarda o‘z vaqtida axborot olish uchun aviakompaniyalar va agentliklar bilan bevosita bog‘lanishga chaqirmoqda. Shu bilan birga, yaqin kunlarda mintaqaviy aviaharakat bo‘yicha qo‘shimcha ma’lumotlar berilishi kutilmoqda. “Zamin”ni Telegramʻda oʻqing!