Joriy haftada O‘zbekistonda ob-havo kutilganidan ham qattiqroq issiqlik bilan sinovga solinadi. "O‘zgidromet" ma’lumotlariga ko‘ra, 2 iyuldan 5 iyulgacha mamlakat bo‘ylab juda yuqori harorat kuzatilishi mumkin.
Mutaxassislarning ta’kidlashicha, bu kunlarda yurtimizga janubiy yo‘nalishdan kelayotgan yuqori haroratli havo oqimlari ta’sirida termometr ko‘rsatkichlari keskin oshib, odatdagidan ancha yuqori darajada bo‘ladi.
2 iyul kuni avvalambor respublikaning shimoliy, janubiy va cho‘l hududlarida havo 40–43 darajagacha qiziydi. Keyingi kunlarda, ya’ni 3–5 iyul oralig‘ida esa mamlakatning deyarli barcha hududlarida shiddatli issiqlik saqlanib qoladi. Janub va cho‘l hududlarida ayrim joylarda 44–46 darajani tashkil etishi ehtimoldan xoli emas.
Muhim jihatlardan yana biri – bu shamolning kuchayishi. 3–5 iyul kunlari ayrim hududlarda shamol tezligi soniyasiga 20–25 metrgacha yetishi mumkin. Bu esa chang va to‘zonli holatlar yuzaga kelishi ehtimolini oshiradi. Ayniqsa, ochiq maydonlarda va cho‘l hududlarida bunday holatlar tez-tez ro‘y berishi kutilmoqda.
Shunday ob-havo sharoitida aholiga to‘g‘ridan to‘g‘ri quyosh nuridan himoyalanish, ko‘proq suyuqlik iste’mol qilish va imkon qadar kunning eng issiq soatlarida ko‘chada ko‘p yurmaslik tavsiya etiladi. Qariyalar, bolalar va yurak-qon tomir kasalliklaridan aziyat chekuvchi fuqarolar esa yanada ehtiyotkor bo‘lishlari lozim.
Hozircha ob-havoning keskin o‘zgarishi bir necha kun saqlanishi kutilmoqda. Shuning uchun mutaxassislar o‘zgaruvchan iqlim sharoitiga tayyor turishni va zarur choralarni ko‘rishni ta’kidlamoqda. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
