Toshkent va Yangi Toshkent uchun yangi mezonlar belgilab berildi

Davlat rahbariga taqdimot qilingan “Yechimlar atlasi” nafaqat shaharsozlik sohasida, balki umumiy hayot sifatini oshirishda ham yangi bosqichni boshlab berishi mumkin. Toshkent va Yangi Toshkentning kelajak qiyofasi, uning me’moriy uslubi, yo‘llar va infratuzilma qanday bo‘lishi kerakligi endi aniq va tizimli asosga ega.

Ma’lumki, poytaxt mamlakat taraqqiyotining yuragi sanaladi. Yangi Toshkent qurilishi esa uning uzviy davomi sifatida, jadal sur’atda barpo etilmoqda. Shu munosabat bilan Toshkent shahrining 2045 yilgacha mo‘ljallangan bosh rejasi tasdiqlandi. Bu hujjatda qurilish, muhandislik tarmoqlari, transport tizimi va muhofaza hududlari qatorida barcha asosiy yo‘nalishlar qamrab olingan.

Mazkur rejaning mantiqiy davomi sifatida ishlab chiqilgan “Yechimlar atlasi” — bu qurilishdagi tartib va muvofiqlikni ta’minlovchi amaliy qo‘llanma. U beshta alohida kitobdan iborat bo‘lib, ko‘chalar muhiti, binolar tashqi ko‘rinishi, jamoat joylari, obodonlashtirish tartiblari bo‘yicha aniq mezonlar va tavsiyalarni o‘z ichiga oladi.

E’tiborlisi, yangi yondashuvda yo‘lni qurish faqat “qizil chiziq” ichida emas, balki binodan binogacha bo‘lgan hududni qamrab olishi nazarda tutilgan. Bu orqali yo‘l bo‘ylarida hech qanday tashlab qo‘yilgan, nazoratsiz joy qolmaydi, hamma narsa uyg‘un va yaxlit holda obodonlashtiriladi. Bu — rivojlangan mamlakatlar tajribasidan olingan innovatsion yondashuv.

Atlasda milliy urf-odatlar va ekologik mezonlar ham inobatga olingan. Barqaror rivojlanish tamoyillari asosida tuzilgan mazkur hujjat faqat qurilish emas, balki aholi turmush tarziga ijobiy ta’sir ko‘rsatishi kutilmoqda.

Taqdimot chog‘ida davlat rahbari ushbu yechimlar ijrosi orqali shahar estetikasini oshirish, jamoat joylarini maqsadli tashkil etish, turmush madaniyatini yuqori bosqichga ko‘tarish kerakligini ta’kidladi. Yo‘l bo‘ylaridagi muhit, binolarning tashqi ko‘rinishi, jamoat infratuzilmasi — bularning barchasi odamlar hayotining uzviy qismi bo‘lishi kerakligi aytildi.

Ko‘zlangan natija aniq: Toshkent nafaqat iqtisodiy markaz, balki insonparvar, qulay va zamonaviy megapolisga aylanishi kerak. “Zamin”ni Telegramʻda oʻqing!