BAA universiteti O‘zbekistonda o‘z filialini ochishi mumkin

O‘zbekiston diplomatlari Birlashgan Arab Amirliklaridagi Al-Ain University rahbariyati bilan muhim muzokaralar o‘tkazishdi. Uchrashuvda oliy ta’lim sohasidagi imkoniyatlar, investitsiya muhiti va ikki tomonlama hamkorlik masalalari asosiy yo‘nalish bo‘ldi.

Suhbat avvalida O‘zbekistonda oliy ta’lim tizimida amalga oshirilayotgan islohotlar hamda qulay investitsiya muhitini shakllantirish yo‘nalishidagi choralar haqida taqdimot o‘tkazildi. Bu mamlakatimizda ilm-fan va ta’lim sohasining yangi bosqichga ko‘tarilayotganidan dalolat berdi.

Muzokara davomida talabalar va professor-o‘qituvchilar almashinuvi dasturini yo‘lga qo‘yish, universitet rahbariyatining O‘zbekistonga safarini tashkil etish va kelgusida yurtimizda Al-Ain University filialini ochish masalalari muhokama etildi.

Universitet raisining o‘rinbosari Nur Aldin Atatrex ushbu takliflarni qo‘llab-quvvatlar ekan, shu bilan birga O‘zbekistonda uy-joy qurilishi va sog‘liqni saqlash yo‘nalishlarida ham qator investitsiya loyihalarini amalga oshirishga qiziqish bildirdi.

Ma’lumot uchun, Al-Ain University 2004-yilda ta’sis etilgan bo‘lib, u ikki asosiy kampusga ega: biri Al-Ayn shahrida, ikkinchisi Abu-Dabida joylashgan. Universitet muhandislik, tibbiyot, farmatsevtika, huquq, ta’lim va ijtimoiy fanlar, biznes va ommaviy kommunikatsiyalar kabi ko‘plab sohalarda yuqori malakali mutaxassislar tayyorlab kelmoqda.

Muttaxassislar fikricha, ushbu hamkorlik O‘zbekiston ta’lim sohasiga yangi sur’at bag‘ishlashi va kelajakda ikki mamlakat o‘rtasidagi ilmiy aloqalarni yanada mustahkamlashi mumkin.