O‘zbekistonda qariyb 290 ming nafar fuqaro huquqbuzarlik sodir etish ehtimoli yuqori bo‘lgan shaxslar sifatida maxsus profilaktik ro‘yxatga kiritilgan. Bu haqda 27-avgust kuni bo‘lib o‘tgan matbuot anjumanida IIV Huquqbuzarliklar profilaktikasi xizmati boshlig‘i o‘rinbosari Rahimjon Nayimov ma’lum qildi.
Ma’lum qilinishicha, ro‘yxatdagi shaxslar doimiy ravishda nazoratda ushlanib, tuzalish yo‘liga kirganlar, uzoq muddatli xorij safariga chiqqanlar yoki vafot etganlar muntazam ravishda ro‘yxatdan chiqarib boriladi. Bu jarayon huquqiy va ijtimoiy jihatdan ham to‘g‘ri amalga oshiriladi.
Amaldagi qonunchilikka muvofiq, ro‘yxatga ilgari sudlangan shaxslar, ayrim ma’muriy huquqbuzarliklarni sodir etganlar, maxsus tarbiyaviy muassasalardan qaytganlar hamda jinoyat ishlari tugatilgan, ammo rasman reabilitatsiya qilinmagan fuqarolar kiritiladi. Shuningdek, “Huquqbuzarliklar profilaktikasi to‘g‘risida”gi qonunga yangicha o‘zgartishlar kiritilishi rejalashtirilmoqda. Yangi qonun loyihasi qabul qilinsa, hisob toifalari 4 ta asosiy guruhga qisqartiriladi va ro‘yxatdagi shaxslar soni qariyb 60 foizga kamayadi.
IIV vakili ta’kidlaganidek, ushbu ro‘yxat fuqarolarni jazolash yoki huquqlarini cheklashga emas, balki ularga yuridik, psixologik, pedagogik va ijtimoiy yordam ko‘rsatishga qaratilgan. “Bu ro‘yxat shaxslarning huquqlarini cheklamaydi. Aksincha, muammolarini aniqlab, mahalliy mutasaddilar bilan birgalikda ijtimoiy moslashuv dasturlari ishlab chiqiladi va amalga oshiriladi”, — dedi vazirlik rasmiysi.
“Zamin”ni Telegramʻda oʻqing!
