Milliy statistika qo‘mitasi ma’lumotlariga ko‘ra, 2025-yil avgust oyi holatida mamlakat hududlari bo‘yicha 1 kilogramm palov tayyorlash qanchaga tushishi hisoblab chiqildi. Ushbu ko‘rsatkichlar palov xalqona taom sifatida har bir hududda qancha xarajat talab qilishi mumkinligini ko‘rsatib bermoqda.
Ma’lumotlarga qaraganda, eng arzon palov Qoraqalpog‘iston Respublikasida tayyorlansa (98 600 so‘m), eng qimmat hisob Toshkent shahrida qayd etildi – 117 400 so‘m. Boshqa hududlardagi ko‘rsatkichlar esa quyidagicha shakllandi:
— Andijon viloyati – 105 500 so‘m,
— Buxoro viloyati – 108 400 so‘m,
— Jizzax viloyati – 110 000 so‘m,
— Qashqadaryo viloyati – 111 700 so‘m,
— Navoiy viloyati – 110 000 so‘m,
— Namangan viloyati – 109 400 so‘m,
— Samarqand viloyati – 113 400 so‘m,
— Surxondaryo viloyati – 111 500 so‘m,
— Sirdaryo viloyati – 105 700 so‘m,
— Toshkent viloyati – 113 600 so‘m,
— Farg‘ona viloyati – 115 000 so‘m,
— Xorazm viloyati – 107 000 so‘m.
Shu tariqa, ko‘rinib turibdiki, palov tayyorlash uchun sarflanadigan mablag‘ hududdan hududga farq qiladi.
Bir kilogramm palov tayyorlash uchun asosiy mahsulotlar miqdori quyidagicha belgilangan:
— kungaboqar yog‘i – 0,3 litr,
— piyoz – 300 gramm,
— mol go‘shti – 700 gramm,
— sabzi – 1 kilogramm,
— guruch – 1 kilogramm,
— no‘xat – 100 gramm,
— zira – 10 gramm,
— osh tuzi – 20 gramm.
Ta’kidlanishicha, yuqorida qayd etilgan raqamlar bozorlarda sotiladigan palovning tayyor holdagi narxi emas. Ular mahsulotlarning o‘zinigina emas, balki taom tayyorlash jarayoni, xizmat xarajatlari va qo‘shimcha ishlov uchun ketadigan mablag‘ni ham o‘z ichiga oladi.
Palov — O‘zbekiston milliy oshxonasining ramziga aylangan taom bo‘lib, uning tayyorlanish narxi ham jamiyatda katta qiziqish uyg‘otadi. Har bir hududdagi iqtisodiy sharoit, mahsulotlar narxi va xizmat ko‘rsatish xarajatlari umumiy qiymatga o‘z ta’sirini o‘tkazishi esa tabiiy hol hisoblanadi.
“Zamin”ni Telegramʻda oʻqing!
