Samarqand viloyati aholisi uchun yaxshi xabar: viloyat hokimligi maktabga borayotgan bolalar uchun bepul avtobus qatnovini yo‘lga qo‘ydi. Bu haqda rasmiylar ma’lumot berdi va ijtimoiy tarmoqlarda keng muhokamalarga sabab bo‘lgan holatga munosabat bildirdi.
Ma’lum bo‘lishicha, voqea 3-sentyabr kuni Paxtachi tumanining Fay mahallasida sodir bo‘lgan. Nurobod tumani Saxoba mahallasidan harakatlanuvchi “Oqtosh-Shaxzod trans” MCHJ avtobus haydovchisi Nazarobod qishlog‘idan maktabga ketayotgan 22 nafar o‘quvchini pul to‘lamagani sabab avtobusga olmagan. Ularning 19 nafari 28-maktabga, 3 nafari esa 34-maktabga qatnashgan.
Bu holat ijtimoiy tarmoqlarda keng muhokamalarga sabab bo‘ldi. Odamlar bolalarning ta’limga kirishi uchun qiyinchiliklarga duch kelganini qayd etishdi. Shu bois, Samarqand viloyati Maktabgacha va maktab ta’limi boshqarmasi rasmiy izoh berib, vaziyatni tushuntirdi va zarur choralar ko‘rilganini ma’lum qildi.
Hodisa yuzasidan avtobus haydovchisiga nisbatan intizomiy jazo qo‘llandi. Endi bu turdagi xatolar takrorlanmasligi uchun har tomonlama nazorat olib boriladi.
Shuningdek, 4-sentyabrdan boshlab viloyat hokimligi tashabbusi bilan Fay mahallasidagi barcha maktab bolalari uchun bepul avtobus qatnovi yo‘lga qo‘yildi. Endi bolalar har qanday qiyinchilikka duch kelmasdan, o‘z vaqtlarida maktabga bora oladi va ta’lim olishda barqarorlik ta’minlanadi.
“Zamin”ni Telegramʻda oʻqing!
