Prezident Shavkat Mirziyoyev taklifiga binoan Serbiya Respublikasi prezidenti Aleksandr Vuchich va uning rafiqasi 28-oktyabr kuni rasmiy tashrif bilan Toshkentga keldi. Davlat rahbarini Toshkent xalqaro aeroportida O‘zbekiston bosh vaziri Abdulla Aripov hamda hukumat va prezident administratsiyasi mas’ul shaxslari tantanali ravishda kutib oldi.
Tashrif ikki davlat o‘rtasidagi do‘stlik va hamkorlik aloqalarini yangi bosqichga ko‘tarish maqsadida tashkil etilgan bo‘lib, dasturda oliy darajadagi muzokaralar, qator strategik kelishuvlar va hujjatlarni imzolash marosimlari nazarda tutilgan.
Uchrashuvlar davomida ikki mamlakat yetakchilari sanoat kooperatsiyasini chuqurlashtirish, agrar va farmatsevtika sohalarida qo‘shma loyihalarni ilgari surish, axborot texnologiyalari va raqamlashtirish yo‘nalishlaridagi sheriklikni kuchaytirish masalalarini muhokama qiladi. Shu bilan birga, turizm, ta’lim va madaniy almashinuv sohalaridagi hamkorlik istiqbollari ham asosiy kun tartibidan o‘rin olgan.
Muzokaralar yakunlari bo‘yicha ikki tomonlama kelishuvlar to‘plamini imzolash rejalashtirilgan. Bu hujjatlar O‘zbekiston va Serbiya o‘rtasidagi siyosiy, iqtisodiy va ijtimoiy munosabatlarni yanada mustahkamlaydi.
Bundan tashqari, ikki davlat rahbarlari xalqaro va mintaqaviy ahamiyatga molik dolzarb masalalar yuzasidan ham fikr almashadi. Har ikki tomon ham tinchlik, barqarorlik va o‘zaro manfaatli hamkorlikni rivojlantirish tarafdori ekani ta’kidlanmoqda.
Ma’lumot uchun, Aleksandr Vuchich Toshkentdagi rasmiy uchrashuvlardan keyin Samarqand shahriga yo‘l oladi. U yerda u YUNESKO bosh konferensiyasining 43-sessiyasida faxriy mehmon sifatida ishtirok etadi.
Kuzatuvchilar fikricha, ushbu tashrif ikki mamlakat o‘rtasidagi munosabatlarni yangi bosqichga olib chiqadi. Toshkentda bo‘ladigan muzokaralar nafaqat iqtisodiy, balki gumanitar sohalarda ham keng ko‘lamli sheriklikning yangi yo‘nalishlarini belgilab beradi.
O‘zbekiston va Serbiya o‘rtasidagi bu muloqot davlatlar manfaatlariga xizmat qilish bilan birga, Markaziy va Janubi-Sharqiy Yevropa o‘rtasidagi ko‘p qirrali aloqalarni mustahkamlashda ham muhim ahamiyat kasb etadi.
“Zamin”ni Telegramʻda oʻqing!
