Toshkentda ko‘chmas mulk bozori yana jonlandi. Ko‘chmas mulkni ommaviy baholash milliy markazi ma’lumotiga ko‘ra, poytaxtda kvartirali uylar narxi sentyabrdan oktyabrgacha sezilarli darajada oshgan.
Ma’lumotlarga qaraganda, ko‘p qavatli uylardagi kvartiralarning har bir kvadrat metri uchun o‘rtacha narx bir oy ichida 13 foizga qimmatlashgan. Bu yilning kuz oyidagi eng katta o‘sish ko‘rsatkichlaridan biri sifatida qayd etildi.
Sentyabr oyida bir kvadrat metr uchun o‘rtacha narx 14,7 million so‘mni tashkil etgan bo‘lsa, oktyabrga kelib bu ko‘rsatkich 16,7 million so‘mga yetdi. Eng yuqori baholangan kvartiralar narxi 96,1 million so‘mgacha ko‘tarilgan, eng arzonlari esa 7,5 million so‘m atrofida bo‘lgan.
Markaz ma’lumotlariga ko‘ra, poytaxtning ayrim tumanlarida narxlar boshqalarga nisbatan ancha baland.
Eng qimmat tumanlar:
-Shayxontohur — 23,9 million so‘m;
-Mirzo Ulug‘bek — 19,1 million so‘m;
-Yunusobod — 17,1 million so‘m.
Eng arzon tumanlar:
-Sergeli — 11,5 million so‘m;
-Bektemir — 11,2 million so‘m;
-Uchtepa — 13,6 million so‘m.
Mutaxassislar fikricha, uy narxlarining keskin oshishiga bir nechta omil ta’sir qilgan. Ular orasida so‘nggi oylarda dollar kursining so‘mga nisbatan ko‘tarilishi, qurilish materiallari narxining o‘sishi va talabning yanada ortgani muhim sabab sifatida tilga olinmoqda.
Avvalroq xabar qilinganidek, sentyabr oyida ham uy-joy ijarasi narxlari o‘sgan. Bir xonali kvartiralarning o‘rtacha ijara bahosi 318 dollardan 334 dollarga ko‘tarilgan. Bu holat ham ko‘chmas mulk bozoridagi umumiy tendensiya — uylarga bo‘lgan talabning keskin ortib borayotganini ko‘rsatadi.
Poytaxtdagi bu holat shundan darak beradiki, kelgusi oylarda ham kvartira narxlari barqaror bo‘lmasligi mumkin. Ekspertlar bozordagi faollikni “mavsumiy jonlanish” deb baholashmoqda, biroq yil oxirigacha yana yangi rekordlar qayd etilishi ehtimoldan xoli emas.
“Zamin”ni Telegramʻda oʻqing!
