O‘zbekiston temir yo‘llari milliy kompaniyasi tezyurar “Afrosiyob” poyezdlari yo‘lovchilari uchun elektron chiptalarni qaytarish tartibi bo‘yicha ma’lumot berdi. Safardan voz kechilgan taqdirda, elektron chipta uchun to‘langan mablag‘lar to‘lov amalga oshirilgan bank kartasiga qaytariladi.
Pul mablag‘lari 3 kundan 15 ish kunigacha qaytarilishi mumkin. Kompaniya ma’lum qilishicha, chipta sotib olishda yo‘lovchi ommaviy oferta shartlariga rozilik bildiradi.
Ushbu oferta mablag‘larni qaytarish tartibini batafsil belgilaydi va safardan voz kechish muddati asosida kompensatsiya miqdorini aniq ko‘rsatadi. “Afrosiyob” poyezdlari uchun chiptalar sotilishi reysga 60 kun qolganda boshlanadi.
Temiryo‘l xodimlari yo‘lovchilarga kuz mavsumi kabi ichki turizm faol mavsum hisoblangan davrlar uchun safarlarni oldindan rejalashtirishni tavsiya etadi. Eslatib o‘tamiz, O‘zbekistonda noyabr oyini qamrab olgan “Pensionerlar uchun turizm oyligi” doirasida 55 yoshdan oshgan ayollar va 60 yoshdan oshgan erkaklar uchun (Afrosiyobdan tashqari) temiryo‘l chiptalariga 20 foizlik chegirma amal qiladi.
