O‘zbekistonda turizm sohasini yanada jadal rivojlantirish maqsadida bir qator yangi tartib va qulayliklar amalga joriy etilmoqda. Hukumat qaroriga binoan, endilikda mamlakatdagi yirik savdo-ko‘ngilochar markazlarga mashhur xalqaro kiyim brendlari jalb etiladi, shaharlar hududida esa milliy me’moriy uslubni o‘zida mujassam etgan zamonaviy autlet majmualari barpo etiladi. Bu ishlar avvalo Toshkent, Samarqand, Buxoro va Xivada boshlanadi, 2030-yildan keyin esa boshqa turistik manzillarga ham bosqichma-bosqich kengaytiriladi.
2026-yil 1-fevraldan boshlab, O‘zbekistonni tark etayotgan xorijlik sayyohlar uchun katta yengillik yaratilmoqda: ular mamlakat ichkarisida sotib olgan tovarlari uchun to‘langan qo‘shilgan qiymat solig‘ini naqd pul tarzida qaytarib olishlari mumkin bo‘ladi. Bu qaror chet ellik mehmonlar uchun yurtga sayohatni yanada qulay va manfaatli qilishni ko‘zlaydi.
Shu bilan birga, 2026-yil 1-martdan turistik startaplar uchun mutlaqo yangi imkoniyat ochiladi. Yangi xizmat turlarini yaratish va amaliyotga tatbiq etish bilan bog‘liq xarajatlarning 50 foizigacha, yillik 1 milliard so‘mgacha subsidiya ajratiladi. Bu xususiy tashabbuslarni rag‘batlantirish, innovatsion g‘oyalarni qo‘llab-quvvatlash va sohada yangi turdosh loyihalarni kuchaytirishni maqsad qiladi.
Bundan tashqari, xalqaro “yashil” sertifikatlarni qo‘lga kiritishga harakat qilayotgan mehmonxonalarning xarajatlari ham yarim qismgacha davlat tomonidan qoplab beriladi. Mazkur chora-tadbirlar orqali ekologik barqaror turizmni rivojlantirish, xizmatlar sifati va raqobatbardoshligini oshirish ko‘zlanmoqda.
Shu tarzda, mamlakatda turizm yo‘nalishidagi innovatsion fikrlar, yangi g‘oyalar va zamonaviy infratuzilma uchun keng ko‘lamli sharoit yaratilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
