2025-yil 1-dekabrdan mamlakat qonunchiligida bir qator muhim yangiliklar amalga kiritiladi. Ushbu o‘zgarishlar nafaqat iqtisodiy sohalarni, balki iste’molchilar huquqi, ekologiya, xavfsizlik, nikoh tuzish tartibi, tadbirkorlik va jamoat faoliyati kabi ko‘plab yo‘nalishlarni qamrab oladi. Quyida e’tiborga molik barcha yangilanishlar kengroq bayon qilindi.
Ai-80 benzini sotuvi to‘liq to‘xtatiladi
Ekologik toza va sifatli yonilg‘iga o‘tishni jadallashtirish maqsadida 1-dekabrdan avtomobillarga yonilg‘i quyish shoxobchalarida Ai-80 benzini savdosi cheklanadi. Bu jarayon mamlakatda havo sifati va ekologik barqarorlikni oshirishga qaratilgan katta choralardan biri sifatida ko‘riladi.
Iste’molchilar murojaatlarini ko‘rib chiqishda yangi tizim ishlaydi
Endilikda “iste’molchi — tadbirkor — NNO — davlat organlari” zanjiri asosida mutlaqo yangicha mexanizm yo‘lga qo‘yiladi. Bu tizim muammolarni tezroq ko‘rib chiqish, taraflar bilan samarali muloqot qilish va iste’molchilar huquqini yanada kuchliroq himoya qilishni ta’minlaydi.
Ekologiya ma’lumotlari to‘liq ochiqlanadi
O‘zbekiston Orxus konvensiyasini ratifikatsiya qilgani munosabati bilan Ekologiya vazirligi davlat ekologik monitoring ma’lumotlarini ochiq bazada joylashtirib boradi. Unda:
-“Yashil makon” doirasida ekilgan daraxtlar;
-daraxt kesish uchun beriladigan ruxsat arizalari;
-jamoatchilik eshituvlari natijalari;
-suv havzalarda noqonuniy qazish bilan bog‘liq ma’lumotlar
kabi muhim axborotlar mavjud bo‘ladi.
Bu esa ekologik jarayonlarning shaffofligini oshiradi va jamoatchilik nazoratini yanada mustahkamlaydi.
Seysmologik onlayn platforma foydalanishga topshiriladi
Yangi platforma orqali aholi:
-ehtimoliy zilzilalar akselerogrammasi bazalari,
-umumiy va batafsil seysmik rayonlash xaritalari,
-faol tektonik yoriqlar to‘g‘risidagi ma’lumotlar bilan erkin tanishishi mumkin bo‘ladi. Ushbu platforma mamlakatning seysmik hududlarda xavfsizlik choralarini kuchaytirishga yordam beradi.
Nikohni rasmiylashtirishda tibbiy ma’lumotnoma talab qilinmaydi
Axborot almashinuvi raqamlashtirilgani bois: nikohlanuvchilardan tibbiy ko‘rik natijasini olib kelish talabi,
-nikohdan ajrashishda sud qarorini qog‘ozda taqdim etish talablari bekor qilinadi. Bu jarayonlarni ancha yengillashtiradi va ortiqcha qog‘ozbozlikni kamaytiradi.
Tadbirkorlar uchun yangi kafolat va imkoniyatlar
Tadbirkorlikni rivojlantirish kompaniyasi tomonidan: yirik biznesga 10 mlrd so‘mgacha kafillik;
-“yashil” iqtisodiyot, ishlab chiqarish va xizmat ko‘rsatish loyihalariga katta qo‘llab-quvvatlash;
-yaxshi kredit tarixiga ega tadbirkorlarga kafolat limitini 1,5 baravar oshirish kabi yangi imkoniyatlar taqdim etiladi. Shu bilan tadbirkorlik muhitini yanada jonlantirish maqsad qilingan.
Xalqaro turizm akademiyasining Samarqand kampusi ish boshlaydi
Turizm sohasi mutaxassislari maxsus o‘quv dasturlari orqali qayta tayyorlanadi va malaka oshiradi. Bitiruvchilarga xalqaro darajada e’tirof etiladigan sertifikatlar beriladi.
Nodavlat sud ekspertlari mustaqil faoliyat yuritishiga ruxsat
Endilikda nodavlat sud ekspertlari alohida sud-ekspertlik byurosi shaklida mustaqil ishlay oladi. Bu sohada raqobatni oshirib, xizmat sifatini yanada yaxshilaydi.
Normativ-huquqiy hujjatlar tahlili uchun yagona platforma ishga tushadi
Advokatlar, yuristlar, sudyalar va keng jamoatchilik qonun hujjatlarini qiyosiy tahlil qilish imkoniga ega bo‘ladi. Platformada sun’iy intellekt texnologiyalari ham joriy etiladi.
Butun mamlakat mahallalari yagona reestrga kiritiladi
1-dekabrgacha to‘liq ishga tushadigan yagona reestrda har bir mahalla haqida ishonchli va yangilangan ma’lumotlar saqlanadi. Bu mahalla faoliyatini samarali boshqarishga yordam beradi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
