O‘zbekiston Prezidenti administratsiyasi rahbari Saida Mirziyoyeva 2 dekabr kuni Toshkentda ekologik vaziyatni yaxshilash bo‘yicha kechiktirib bo‘lmaydigan chora-tadbirlar masalasida maxsus komissiya yig‘ilishini o‘tkazdi. Bu haqda komissiyaning Telegram kanali orqali xabar berildi.
Jahon ekologik vaziyatiga oid holatlarni yaxshilashga qaratilgan ushbu tadbirda Ekologiya va iqlim o‘zgarishi milliy qo‘mitasi raisi Aziz Abduhakimov, Toshkent shahar hokimi Shavkat Umurzoqov, Toshkent viloyati hokimi Zoyir Mirzayev, shuningdek, huquqni muhofaza qiluvchi organlar vakillari ma’ruza qilganlar.
"Havo ifloslanishi bo‘yicha muammo shaxsan davlatimiz rahbarining doimiy nazorati ostida. Hozirda ushbu holatga doir ilmiy tahlillar olib borilmoqda va mahalliy mutaxassislar bilan birga xorijiy ekspertlar ham jalb etilgan", – deyiladi xabarda.
Saida Mirziyoyeva maxsus komissiya a’zolariga aniq vazifalarni qo‘ydi. Unga ko‘ra, har bir amalga oshirilayotgan chora-tadbirning o‘z muddati bo‘lishi, tizimli harakatlar orqali kelgusi yilda havo ifloslanishining takrorlanmasligi kerak. Komissiya o‘z ishini aniq va kechiktirilmay amalga oshirishga majbur.
Hukumat va mas’ul idoralardan yashil o‘simliklarni ko‘paytirish, ariqlar tizimini tiklash, sanoat korxonalari chiqindilarini kamaytirish va havo bilan bog‘liq vaziyatni yaxshilash bo‘yicha yana bir qator qarorlar talab qilingan.
"Prezidentimiz mendan har kuni bu masala bo‘yicha hisobot so‘ramoqda. Xalqimiz salomatligi bilan bog‘liq bo‘lgan masalalarda hech birimiz sustkashlikka yo‘l qo‘yishimiz mumkin emas", – degan Saida Mirziyoyeva.
Jamiyatimiz uchun ahamiyatli bo‘lgan masalada Toshkent shahri va Toshkent viloyati hokimlaridan haftalik hisobotlar taqdim etish talab qilindi. Bu tashabbuslar mamlakatimiz ekologik xavfsizligini ta’minlashga yordam beradi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
