O‘zbekiston qishloq xo‘jaligida yangi davr boshlanmoqda. Prezident Shavkat Mirziyoyev ta’kidlaganidek, paxtachilik tarmog‘ini tubdan yangilash, unga zamonaviy ilmiy-nazariy yondashuvni joriy etish, fermerlarni qo‘llab-quvvatlash bo‘yicha yirik islohotlar amalga oshirilishi belgilandi. Bu o‘zgarishlar nafaqat hosildorlikni oshirishga, balki butun tarmoqni global raqobatga moslashga qaratilgan.
Birinchi navbatda, mahalliy yangi paxta navlarini yaratish strategiyasiga katta urg‘u berilmoqda. Ilmiy markazlar tomonidan 56 ta mahalliy navni xorijda qo‘llanilayotgan ilg‘or navlar bilan seleksiya qilish orqali yangi, yuqori samara beradigan navlar olish rejalashtirilgan. Bu maqsadda Genomika va Paxtachilik ilmiy institutlarida zamonaviy fitotron va maxsus issiqxonalar barpo etiladi. Bunday infratuzilma seleksiya jarayonini bir necha marta tezlashtirib, mahalliy sharoitga mos, eksportbop navlarni yaratish imkonini beradi.
Shuningdek, paxta yetishtirish xarajatlarini kamaytirish maqsadida fermerlarga birja orqali mineral o‘g‘it va yoqilg‘i–moylash mahsulotlarini 10–15 foiz arzon narxlarda taqdim etish amaliyoti kelgusi yilda ham saqlanib qoladi. Bu esa fermerlarga katta yengillik yaratib, ishlab chiqarishni barqaror va iqtisodiy jihatdan samarali qiladi.
Yangi tartibga muvofiq, paxta va g‘alla sohasida faoliyat yuritayotgan xo‘jaliklar uchun maxsus reyting tizimi joriy etilmoqda. Unga ko‘ra, kamida 10-yildan beri barqaror ishlayotgan, kredit, soliq va lizing bo‘yicha hech qanday qarzdorligi yo‘q fermerlar reytingning yuqori pog‘onalariga chiqish imkoniyatiga ega bo‘ladi. Bu tizim nafaqat shaffoflikni ta’minlaydi, balki fermerlar o‘rtasida sog‘lom raqobatni kuchaytiradi.
Reytingning eng yuqori qismida joy olgan fermerlar qo‘shimcha imtiyozlarga ham ega bo‘ladi: Qishloq xo‘jaligi jamg‘armasidan ajratiladigan kreditlar stavkalari paxtachilik uchun 8 foiz, g‘alla yetishtirish uchun esa 10 foiz qilib pasaytiriladi. Bu esa yaxshi natija ko‘rsatayotgan xo‘jaliklarni qo‘shimcha rag‘batlantirib, tarmoqni yanada barqaror va samarali qilishga xizmat qiladi.
Yangi islohotlar – fermer mehnatini qadrlash, ilmiy yondashuvni kuchaytirish, raqobatbardosh mahsulot ishlab chiqarish va eksport salohiyatini oshirishga qaratilgan muhim qadamlar. Mamlakat qishloq xo‘jaligida boshlanayotgan bu yangi bosqich esa kelgusi yillarda o‘z samarasini berishi shubhasiz.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
