O'zbekistonda gidroelektr stansiyalarda elektr ishlab chiqarish keskin pasaydi. Energetika vaziri Jurabek Mirzamaxmudovning Oliy Majlis Qonunchilik palatasidagi chiqishida aytishicha, bunga suv oqimi o‘tgan yilga nisbatan 35 foizga qisqargani sabab bo‘lgan. Bu haqda podrobno.uz xabar beradi.
Vazirning ta’kidlashicha, yirik GESlarda ko‘rsatkichlar tushishiga aynan suv resurslari taqchilligi asosiy omil bo‘ldi. Yangi ishga tushirilgan kichik va mikro-GESlar ham vaziyatni sezilarli o‘zgartira olmadi — ularning jami ishlab chiqarishi 140 million kilovatt-soatni tashkil etib, mamlakat energotizimi ehtiyojlari uchun juda kam bo‘lib qolmoqda.
Mirzamaxmudov suv zaxiralari cheklangani sabab O‘zbekiston muqobil energetikaga urg‘u berishga majbur bo‘layotganini qayd etdi. Uning so‘zlariga ko‘ra, yirik GESlarni barpo etish 6–10 yil vaqt oladi, shu bois aholini barqaror elektr bilan ta’minlashning eng tez va samarali yo‘li — quyosh va shamol elektr stansiyalari, shuningdek energiya saqlash tizimlarini rivojlantirishdir.
“Biz, albatta, gidroenergetikani rivojlantirishda davom etamiz. Biroq u suv resurslariga bog‘liq bo‘lgani uchun gaz sarfini kamaytirish maqsadida quyosh, shamol va energiya saqlash tizimlari kabi muqobil manbalarga alohida e’tibor qaratmoqdamiz”, — dedi vazir.
Avvalroq Suv xo‘jaligi vaziri Shavkat Hamraev O‘zbekistonda ichki suv resurslari zaxirasi so‘nggi bir yil ichida 6,5 milliard kub metrga kamayganini ma’lum qilgan edi. Kamayish suvni tejovchi texnologiyalar faol joriy etilayotganiga qaramay, ichki suv omborlarida suv to‘planishi pasaygani bilan izohlangan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
