Uzatom agentligi va Rossiyadagi Milliy tadqiqot markazi — Kurchatov instituti tinch maqsadlarda atom energiyasidan foydalanish yo‘nalishida ilmiy-texnik hamkorlikni kengaytirishga qaratilgan strategik sheriklik bitimini imzoladi. Bu haqda podrobno.uz xabar beradi.
Agentlik ma’lumotiga ko‘ra, hujjat Uzatom direktori Azim Ahmedhadjaev boshchiligidagi O‘zbekiston delegatsiyasining tashrifi davomida rasmiylashtirilgan. Ahmedhadjaev kelishuv O‘zbekiston uchun dunyodagi eng kuchli ilmiy markazlardan biri tajribasi va infratuzilmasidan to‘g‘ridan-to‘g‘ri foydalanish imkonini berishini ta’kidladi. Uning aytishicha, bu milliy ilmiy maktabni tizimli rivojlantirish va mamlakat manfaatlariga xizmat qiladigan yirik loyihalarni amalga oshirishga xizmat qiladi.
Tomonlar hamkorlikning ustuvor yo‘nalishlari sifatida kichik modulli va ko‘chma atom stansiyalari salohiyatini o‘rganish, yadro tibbiyotini rivojlantirish hamda radioizotoplar ishlab chiqarishni kengaytirishni belgiladi. Shuningdek, plazma fizikasi, termoyadro sintezi, sinxrotron nurlanishidan foydalanish va neytron manbalari bo‘yicha tadqiqotlar ham rejalashtirilgan.
Hamkorlik doirasida tabiatga yaqin va “yashil” texnologiyalarni joriy etish, atom sanoati uchun yangi materiallar yaratish, qo‘shma laboratoriyalar ochish hamda malakali kadrlar tayyorlash dasturlarini yo‘lga qo‘yish ko‘zda tutilmoqda. Delegatsiya institutning tokamak T-15MD qurilmasi va sinxrotron nurlanish manbasi kabi noyob ilmiy infratuzilmasi bilan ham tanishgan.
Avvalroq Jizzax viloyati Forish tumanida O‘zbekistondagi ilk atom elektr stansiyasi loyihasi bo‘yicha atrof-muhitga ta’sirni baholash materiallari yuzasidan jamoatchilik eshituvi o‘tkazilgandi. Ochiq muhokamada ishtirokchilarga loyiha bo‘yicha asosiy texnik yechimlar taqdim etilgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
