Oʻzbekistonda 2025 yilda elektr ishlab chiqarish oshdi quyosh va shamol energiyasi hajmi ikki baravar ko‘paydi
2025 yilda Oʻzbekistonda elektr energiyasi ishlab chiqarish 6% ga oshdi. Energetika vazirligi ma’lumotiga ko‘ra, quyosh va shamol elektr stansiyalari ishlab chiqargan energiya hajmi ikki baravar ko‘payib, ilk bor 10,5 milliard kilovatt-soatdan oshdi. Bu haqda podrobno.uz xabar beradi.
Qayta tiklanuvchi manbalar hisobidan “yashil” generatsiya, gidroenergetikani ham qo‘shganda, 16,8 milliard kilovatt-soatga yetdi. Bu ko‘rsatkich o‘tgan davrga nisbatan 29% ga yuqori. Natijada mamlakat 3,2 milliard kub metr gazni tejadi, zararli modda chiqindilari esa 4,7 million tonnaga kamaydi.
Yil davomida umumiy quvvati 4 647 megavatt bo‘lgan 42 ta yangi loyiha ishga tushirildi. Ular qatorida 5 ta quyosh, 4 ta shamol stansiyasi, 10 ta akkumulyator tizimi, 1 ta issiqlik elektr stansiyasi hamda 2 ta kogeneratsiya qurilmasi bor.
Shu bilan birga, jami 3 508 megavatt quvvatni qamrab olgan 21 ta loyihada qurilish ishlari davom etmoqda. Rejalarga elektr stansiyalari va energiya saqlash tizimlari bilan birga podstansiyalar, shuningdek 2 050 kilometr yangi elektr tarmoqlarini barpo etish ham kiritilgan.
Magistral va taqsimlovchi tarmoqlarning minglab kilometri kapital ta’mirdan chiqarildi, transformatorlar hamda podstansiyalar yangilandi. Bu 954 ta mahalladagi 800 mingdan ortiq xonadon elektr ta’minotini yaxshilashga xizmat qilgani qayd etildi.
Energiya tejamkorligi dasturi doirasida 2,7 milliard kilovatt-soat elektr va 2 milliard kub metr gaz iqtisod qilingani bildirildi.
Avvalroq Yangi Toshkent hududida Xitoy hamkorlari bilan Oʻzbekistondagi ilk yopiq turdagi podstansiya qurilayotgani xabar qilingandi. U zamonaviy trigeneratsiya texnologiyasi asosida ishlashi va shaharni bir vaqtning o‘zida isitish, sovitish hamda energiya tejalishini ta’minlashi aytilgan.
“Zamin”ni Telegramʻda oʻqing!
