2030 yilga borib Oʻzbekistonda oʻrtacha umr ko‘rish 78 yoshga yetkazilishi rejalashtirilmoqda
Oʻzbekistonda 2030 yilga borib aholi oʻrtacha umr ko‘rish davomiyligini 78 yoshga yetkazish maqsadi belgilandi. Bu yangilangan “Oʻzbekiston–2030” strategiyasi loyihasida qayd etilgan. Bu haqda podrobno.uz xabar beradi.
Hujjatga ko‘ra, ko‘rsatkich bosqichma-bosqich oshiriladi: 2026 yilda — 75,5 yosh, 2027 yilda — 76 yosh, 2028 yilda — 76,8 yosh, 2029 yilda — 77,5 yosh, 2030 yilda esa — 78 yosh.
Rejani amalga oshirish uchun sog‘liqni saqlash tizimini moliyalashtirishni kuchaytirish ko‘zda tutilgan. 2030 yilga kelib davlat budjetidan tibbiyotga ajratmalar YAIMning 5 foizigacha oshirilishi rejalashtirilmoqda.
Strategiyada muddatidan oldin o‘lim ko‘rsatkichlarini kamaytirish ham asosiy yo‘nalishlardan biri sifatida belgilangan. Xususan, 30–69 yosh oralig‘ida yurak-qon tomir kasalliklaridan erta o‘limni 27 foizgacha, onkologik kasalliklardan erta o‘limni esa 5,2 foizgacha tushirish maqsad qilingan.
Shuningdek, surunkali xastaliklar bilan kurashga alohida e’tibor qaratiladi: qandli diabet bilan og‘rigan bemorlarni davolash bilan to‘liq qamrab olish, nafas olish a’zolari kasalliklaridan muddatidan oldin o‘limni 1,5 foizdan oshirmaslik, sil kasalligi bo‘yicha kasallanish darajasini esa 33 foizdan yuqori bo‘lmagan ko‘rsatkichda ushlab turish rejalashtirilgan.
Milliy statistika qo‘mitasi ma’lumotlariga ko‘ra, so‘nggi o‘n yilliklarda Oʻzbekistonda oʻrtacha umr ko‘rish davomiyligi izchil o‘sib borgan. 1991 yilda bu ko‘rsatkich 66,4 yosh bo‘lgan bo‘lsa, 1995 yilda — 69,1, 2000 yilda — 70,8, 2005 yilda — 71,8, 2010 yilda — 73, 2015 yilda — 73,6 yoshni tashkil etgan.
2020 yilda ko‘rsatkich 73,4 yoshgacha biroz pasaygan, biroq keyingi yillarda yana o‘sib, 2023 yilda 74,7 yoshga, 2024 yilda esa 75,1 yoshga yetgan.
Rasmiylar rejalashtirilgan chora-tadbirlar nafaqat umr davomiyligini uzaytirishi, balki profilaktika, erta tashxis va tibbiy yordamdan foydalanish imkoniyatlarini kengaytirish orqali hayot sifatini ham yaxshilashini ta’kidlamoqda.
“Zamin”ni Telegramʻda oʻqing!
