Surxondaryo viloyatining Boysun tumanida joylashgan “M-25” koni hududida 2025 yilning oxirgi kunlarida tarkibida neft mavjud bo‘lgan suyuqlikning yer yuzasiga chiqishi holati aniqlandi. Mazkur holat yuzasidan mas’ul idoralar zudlik bilan chora-tadbirlar ko‘rishga kirishdi.
Energetika vazirligi 5 yanvar kuni ushbu voqea bo‘yicha rasmiy axborot tarqatib, neft suyuqligining keng hududga yoyilib ketishini oldini olish maqsadida kon atrofida hamda soy o‘zani bo‘ylab qo‘shimcha himoya hovuzlari tashkil etilganini ma’lum qildi. Bu choralar neft suyuqligini nazorat ostida ushlab turishga qaratilgan.
Vazirlik xabarida qayd etilishicha, yig‘ib olingan neft suyuqligi uzluksiz ravishda maxsus ajratilgan maydonga tashib chiqilmoqda. U yerda har biri 5 ming kub metr sig‘imga ega bo‘lgan, to‘liq izolyatsiya qilingan ikkita shlam hovuzi mavjud. Ushbu inshootlar neft suyuqligini xavfsiz saqlash hamda keyinchalik uni qayta ishlash yoki samarali foydalanish imkonini beradi.
Shuningdek, barcha ishlar amaldagi sanoat xavfsizligi va ekologik talablarga qat’iy rioya etilgan holda olib borilayotgani ta’kidlangan. Neft suyuqligidan olingan namunalar asosida laboratoriya tahlillari o‘tkazilmoqda. Tahlil natijalariga ko‘ra, uni qayta ishlash imkoniyatlari baholanadi, geologik tadqiqotlar esa hozir ham davom etmoqda.
Ayni paytda holat doimiy monitoring ostiga olingan bo‘lib, neft suyuqligining tarqalishi jilovlangan. Ilk kunlarda kanalga oqib chiqqan neft suyuqliklarini tozalash ishlari izchil ravishda olib borilmoqda. Mutaxassislar vaziyat to‘liq nazoratda ekanini bildirmoqda.
“Zamin”ni Telegramʻda oʻqing!
