2025 yilda O'zbekistonda qishloq, o'rmon va baliqchilik xo'jaligi barqaror o'sishni ko'rsatdi. Yil yakunlariga ko'ra, ushbu tarmoqlarda ishlab chiqarilgan mahsulot va xizmatlar umumiy qiymati 538 919,7 mlrd so'mni tashkil etdi. Bu haqda uzdaily.uz xabar beradi.
Milliy statistika qo'mitasi ma'lumotiga ko'ra, asosiy ulush — 518 822,7 mlrd so'm — dehqonchilik, chorvachilik, ovchilik hamda ularga bog'liq xizmatlar hissasiga to'g'ri keldi. O'rmon xo'jaligida 15 081,5 mlrd so'mlik, baliqchilikda esa 5 015,5 mlrd so'mlik mahsulot ishlab chiqarildi.
Hududlar kesimida o'sish sur'atlari bo'yicha Sirdaryo (106,9%), Farg'ona (105,6%), Xorazm (104,9%), Qoraqalpog'iston (104,9%), Andijon (104,7%) va Navoiy (104,7%) yetakchi bo'ldi. Nisbatan mo''tadil o'sish Samarqand (103,3%), Surxondaryo (103,8%), Toshkent (104,2%) va Qashqadaryo (104,3%) viloyatlarida qayd etildi.
2025 yilda qishloq xo'jaligi mahsulotlari ishlab chiqarish hajmi 508 711,1 mlrd so'mga teng bo'lib, bu 2024 yilga nisbatan 4,4% ko'pdir. Dehqonchilik yo'nalishida 243 007,7 mlrd so'm (7,2% o'sish), chorvachilikda 265 703,4 mlrd so'm (1,6% o'sish) natija qayd etildi.
Qishloq xo'jaligi ishlab chiqarishining eng katta hajmlari Samarqand (57 963,3 mlrd so'm), Andijon (50 263,3 mlrd so'm), Qashqadaryo (49 950,0 mlrd so'm) va Toshkent (48 794,1 mlrd so'm) viloyatlarida kuzatildi. Eng past ko'rsatkichlar esa Sirdaryo (17 263,2 mlrd so'm), Qoraqalpog'iston (19 932,0 mlrd so'm) hamda Navoiy (23 574,3 mlrd so'm) hududlariga to'g'ri keldi.
Xo'jalik toifalari bo'yicha mahsulotning asosiy qismi dehqon va tomorqa xo'jaliklarida shakllandi — 62,3%. Fermer xo'jaliklari 29,4% ulushni ta'minladi, qishloq xo'jaligi faoliyati bilan shug'ullanuvchi tashkilotlar hissasi 8,3% bo'ldi.
Don yetishtirishda asosiy yuk fermalar zimmasida: umumiy hajmning 75,7%i fermer xo'jaliklari hissasiga to'g'ri keladi. Dehqon va tomorqa xo'jaliklari 12,7%, tashkilotlar esa 11,6%ni berdi. Kartoshka hamda sabzavot yetishtirishda dehqon xo'jaliklari yetakchi, poliz ekinlarida esa fermerlar ustun. Meva-rezavorlar va uzum ishlab chiqarishida fermerlar hamda dehqon xo'jaliklari ulushi deyarli teng taqsimlangan.
Chorvachilik mahsulotlari qiymati 265 703,4 mlrd so'mni tashkil etib, tarmoqda 1,6% o'sish qayd etildi. Eng yirik ishlab chiqaruvchi hududlar qatorida Qashqadaryo (31 655,4 mlrd so'm), Samarqand (29 797,9 mlrd so'm), Buxoro (25 833,9 mlrd so'm), Toshkent (25 654,2 mlrd so'm) va Jizzax (21 429,6 mlrd so'm) bor. Eng past ko'rsatkichlar Sirdaryo (7 489,8 mlrd so'm), Qoraqalpog'iston (10 961,9 mlrd so'm) va Navoiy (16 256,3 mlrd so'm)da qayd etildi.
Mahsulot turlari bo'yicha o'sish quyidagicha bo'ldi: go'sht — 101,5%, sut — 101,2%, tuxum — 107,0%, qirqilgan jun — 104,1%, qorako'l terisi — 104,4%, ovlangan baliq — 103,4%.
Ishlab chiqarish tarkibida go'sht va sutning asosiy qismi dehqon xo'jaliklari hisobidan: mos ravishda 81,3% va 90,6%. Tuxum, jun hamda qorako'l terisi bo'yicha ham shunga yaqin taqsimot kuzatiladi. Baliqchilik mahsulotlarida esa fermer xo'jaliklari ulushi yuqoriroq bo'lib, 56,6%ni tashkil etdi.
2026 yil 1 yanvar holatiga ko'ra, yirik shoxli qoramol soni 14 522,8 ming boshga yetdi (+0,9%), sigirlar — 5 154,4 ming bosh (+0,3%), qo'y va echkilar — 24 970,2 ming bosh (+1,4%), otlar — 299,6 ming bosh (+5,9%), parrandalar — 118 652,6 ming bosh (+10,6%).
Chorva bosh soni tarkibida yirik shoxli qoramol, sigirlar hamda qo'y-echkilar bo'yicha dehqon va tomorqa xo'jaliklari ustunligini saqlab qoldi. Otlar va parrandalarda ulush nisbatan muvozanatliroq ko'rinsa-da, yetakchilik baribir dehqon xo'jaliklari tomonida qolmoqda.
Umuman, 2025 yil natijalari agrar tarmoqda ishlab chiqarish kengaygani, turli xo'jalik toifalari faol ishtirok etgani va mamlakatning oziq-ovqat hamda iqtisodiy barqarorligi mustahkamlanayotganini ko'rsatdi.
“Zamin”ni Telegramʻda oʻqing!
