27 aprel kuni O‘zbekiston Prezidenti Administratsiyasi rahbari Saida Mirziyoyeva Xorazm viloyatiga tashrif doirasida Ichan-qal’a majmuasini ko‘zdan kechirdi. Bu haqda u o‘zining rasmiy Telegram-kanali orqali ma’lum qildi.
Ma’lum qilinishicha, tashrif davomida Saida Mirziyoyeva tarixiy shaharning eng muhim va noyob obidalari bilan yaqindan tanishgan. Jumladan, u Toshhovli saroyi, Muhammad Amin inoq madrasasi, Muhammad Aminxon madrasasi, Juma masjidi hamda Ko‘hna Ark kabi tarixiy inshootlarni ko‘zdan kechirgan.
Tashrif doirasida Ichan-qal’aning kelgusi rivojlanish strategiyasi, ya’ni master-rejasi muhokama qilingan. Shuningdek, madaniy meros obyektlarini asrab-avaylash, ularni qayta tiklash (restavratsiya qilish) va zamonaviy muzey formatlariga moslashtirish masalalariga alohida e’tibor qaratilgan.
Saida Mirziyoyeva o‘z chiqishida mamlakatning boy tarixiy merosini saqlab qolish va uni kelgusi avlodlarga yetkazish muhim vazifa ekanini ta’kidladi. Uning qayd etishicha, aynan shu maqsadda Xorazm viloyatida madaniy merosni muhofaza qilish bo‘yicha maxsus dastur ishlab chiqiladi.
“Umumiy tarixiy ildizlarimiz va betakror milliy o‘zligimizni asrab-avaylash — ustuvor vazifalardan biri. Shu yo‘nalishda tizimli ishlar olib boriladi”, deyiladi xabarda.
Umuman olganda, mazkur tashrif Xiva shahridagi noyob me’moriy yodgorliklarni saqlash, ularning turistik jozibadorligini oshirish hamda xalqaro darajada targ‘ib qilish borasida muhim qadam sifatida baholanmoqda.
