O‘zbekistonda oila institutini qo‘llab-quvvatlash va otalarning farzand tarbiyasidagi ishtirokini kuchaytirishga qaratilgan yangi tashabbus muhokama qilinmoqda. Oliy Majlisda ko‘rib chiqilayotgan qonun loyihasiga muvofiq, endi ishlovchi erkaklarga farzandi dunyoga kelganida qisqa muddatli haq to‘lanadigan ta’til berish rejalashtirilmoqda.
Qonun tashabbusi qabul qilinsa, yangi tug‘ilgan chaqaloq parvarishi davrida otalar ham rasman oilasi yonida bo‘lish imkoniyatiga ega bo‘ladi.
Loyihada belgilanishicha, ishlovchi erkaklarga 5 ish kunidan iborat qo‘shimcha ta’til ajratilishi mumkin. Ushbu davr mobaynida xodimning ish joyi saqlab qolinadi va o‘rtacha ish haqi ham to‘liq to‘lanadi.
Tashabbus mualliflari fikricha, bu yangilik avvalo yosh oilalarni qo‘llab-quvvatlashga xizmat qiladi. Chunki farzand tug‘ilgan ilk kunlarda ona va chaqaloq alohida e’tibor hamda yordamga muhtoj bo‘ladi.
Qonun loyihasida ta’kidlanishicha, mazkur ta’tilning asosiy maqsadi — yangi tug‘ilgan bolaga qarash, turmush o‘rtog‘iga ko‘maklashish va oiladagi boshqa farzandlarga ham yetarli vaqt ajratish imkonini yaratishdan iborat.
Mutaxassislar fikricha, bu kabi ijtimoiy kafolatlar nafaqat oilaviy munosabatlarni mustahkamlaydi, balki otalarning farzand tarbiyasidagi mas’uliyati va ishtirokini ham oshirishga xizmat qiladi.
Ko‘plab rivojlangan davlatlarda bunday amaliyot allaqachon joriy qilingan bo‘lib, u oiladagi psixologik muhit va bola tarbiyasiga ijobiy ta’sir ko‘rsatishi ta’kidlanadi.
Hozircha qonun loyihasi muhokama bosqichida turibdi. U to‘liq qabul qilinishi uchun parlamentning keyingi bosqichlaridan o‘tishi talab etiladi. Agar tashabbus qo‘llab-quvvatlansa, O‘zbekistonda ishlovchi otalar uchun yangi ijtimoiy imtiyozlardan biri paydo bo‘ladi.
“Zamin”ni Telegramʻda oʻqing!
