O‘zbekistonda sel-toshqin suvlaridan samarali foydalanish va qishloq xo‘jaligi yerlarining suv ta’minotini yaxshilashga qaratilgan yangi qaror qabul qilindi. Prezidentning “Sel-toshqin suvlaridan samarali foydalanishni ta’minlash chora-tadbirlari to‘g‘risida”gi qaroriga muvofiq, 2027 yildan boshlab respublika hududlarida 5 ta sel-suv ombori qurilishi rejalashtirilmoqda.
Mazkur loyihalar orqali bir qator hududlarda suv ta’minotini yaxshilash ko‘zda tutilgan. Xususan, Samarqand viloyatida 7 ming gektar, Toshkent viloyatida 2 ming gektar hamda Jizzax viloyatida 300 gektar yer maydonlarining suv bilan ta’minlanish darajasi oshiriladi. Bu esa qishloq xo‘jaligi mahsuldorligiga ijobiy ta’sir qilishi kutilmoqda.
Shuningdek, sel-suv omborlari qurilishi natijasida yangi yer maydonlarini o‘zlashtirish imkoniyati ham paydo bo‘ladi. Samarqand viloyatida 3,3 ming gektar, Toshkent viloyatida esa 300 gektar yangi yerlar qishloq xo‘jaligi aylanmasiga kiritilishi rejalashtirilgan. Bu nafaqat suv resurslaridan oqilona foydalanish, balki yangi iqtisodiy imkoniyatlar yaratishga ham xizmat qiladi.
Qaror bilan 2027–2030 yillarda quriladigan sel-suv omborlarining manzilli dasturi ham tasdiqlandi. Unga ko‘ra, loyihalar bosqichma-bosqich amalga oshiriladi. Sel-suv omborlari va ularga tegishli inshootlar, karerlar hamda qurilish maydonlari uchun zarur yer uchastkalari qonunchilikda belgilangan tartibda jamoat ehtiyojlari uchun olib qo‘yilishi mumkin.
Bunda jismoniy va yuridik shaxslarga yetkazilishi mumkin bo‘lgan mulkiy zararlar qonunchilikda belgilangan tartibda qoplab beriladi. Ya’ni loyihalar amalga oshirilishida fuqarolar va tadbirkorlar huquqlari inobatga olinishi belgilangan.
Qisqasi, O‘zbekistonda sel-toshqin suvlarini behuda oqizib yubormasdan, ulardan qishloq xo‘jaligi va suv ta’minotida samarali foydalanish maqsad qilinmoqda. 5 ta yangi sel-suv ombori qurilishi hududlarda suv tanqisligini yumshatish, yangi yerlarni o‘zlashtirish va agrar sohada barqarorlikni oshirishga xizmat qiladi.
“Zamin”ni Telegramʻda oʻqing!
