O‘zbekiston fuqarolari endi xorijga chiqish uchun alohida pasportga ega bo‘lishadi

O‘zbekiston Respublikasi Prezidenti Shavkat Mirziyoyev respublika fuqarolari uchun xorijga chiqish pasportlarini joriy etish bo‘yicha mutasaddi organlar oldiga aniq va muayyan choralarni ishlab chiqish vazifasini qo‘ydi.

Prezidentning 2017 yil 11 iyulda qabul qilingan «Migrasion jarayonlar va fuqarolikni rasmiylashtirish sohasida ichki ishlar organlari faoliyatini tubdan takomillashtirish chora-tadbirlari haqida»gi Qaroriga muvofiq, Davlat idoralari bir oy muddat ichida xorijiy davlatlarga chiqish pasportini joriy etish uchun asoslangan takliflarni kiritishi lozim.

Ushbu qaror Prezidentning rasmiy saytida e’lon qilindi.

«Bir oy muddat ichida xorijga chiqish pasportini joriy etishning aniq bosqichlari, muddatlari, texnik shartlari va moliyaviy xarajatlarini nazarda tutuvchi, asoslangan takliflar kiritilsin», — deyiladi hujjatda.

Qarorga ko‘ra, takliflarni ishlab chiqish bilan Vazirlar mahkamasi huzuridagi davlat personallashtirish markazi, Ichki ishlar vazirligi, Tashqi ishlar vazirligi, Axborot texnologiyalari va kommunikasiyalarni rivojlantirish vazirligi, Milliy xavfsizlik xizmati va «Davlat belgisi» davlat ishlab chiqarish birlashmasi shug‘ullanishi belgilab qo‘yilgan.

O‘zbekiston Respublikasi moliya vazirligiga qarorda nazarda tutilgan chora-tadbirlarni amalga oshirish uchun zarur mablag‘larni ajratish vazifasi yuklatilgan. “Zamin” yangiliklarini “Instagram”da kuzatib boring