Toshkent shahri va Farg‘ona viloyati Ekologiya boshqarmalariga boshliqlar tayinlandi

Farhod Dehqonov Toshkent shahar ekologiya va atrof-muhitni muhofaza qilish boshqarmasi rahbari etib tayinlandi, Bahromjon Jumanov Farg‘ona viloyatida shu lavozimni egalladi.

Farhod Dehqonov Toshkent shahar ekologiya va atrof-muhitni muhofaza qilish boshqarmasi boshlig‘i etib tayinlandi.

Farhod Dehqonov 1980-yilda tug‘ilgan, mutaxassisligi: ekologiya va atrof-muhitni muhofaza qilish. Bungacha u Toshkent shahar ekologiya boshqarmasi boshlig‘i birinchi o‘rinbosari lavozimida ishlab kelgan.

Bahromjon Jumanov esa Farg‘ona viloyati ekologiya va atrof-muhitni muhofaza qilish boshqarmasiga rahbar bo‘ldi.

U 1970-yilda tug‘ilgan, mutaxassisligi olim-agronom. Shu vaqtgacha Davlat ekologiya qo‘mitasi huzuridagi «Davlat ekologik sertifikatlashtirish va standartlashtirish markazi» davlat unitar korxonasi direktori o‘rinbosari lavozimida ishlagan.

Davlat ekologiya qo‘mitasi matbuot xizmatining qayd etishicha, har ikkala yangi rahbar ham prezident huzuridagi Davlat xizmatlarini rivojlantirish agentligining vacancy.argos.uz sayti orqali qo‘mita tomonidan e’lon qilingan ochiq tanlov asosida ishga qabul qilingan. Ular mos ravishda 82,5 va 80 ball to‘plab, sinovdan o‘tgan hamda Davlat ekologiya qo‘mitasi tanlov komissiyasi bilan suhbatdan o‘tkazilgan. “Zamin” yangiliklarini “Youtube”da kuzatib boring