8 ta davlat tashkilotiga yuridik xizmat ko‘rsatish tartibi o‘zgaradi

Prezidentning “Yuridik xizmat ko‘rsatish markazlari faoliyatini kengaytirish bo‘yicha qo‘shimcha chora-tadbirlari to‘g‘risida”gi qarori loyihasi e’lon qilindi.

Prezidentning “Davlat organlari va tashkilotlariga yuridik xizmat ko‘rsatish faoliyatini yanada takomillashtirish chora-tadbirlari to‘g‘risida”gi qarori ijrosi yuzasidan respublikaning barcha tuman va shaharlarida Qoraqalpog‘iston Respublikasi Adliya vazirligi, viloyatlar va Toshkent shahar adliya boshqarmalarining huzurida Yuridik xizmat ko‘rsatish markazlari tashkil etilgan.

Adliya vazirligining 2022 yil 1 avgustdan boshlab bosqichma-bosqich markazlar tomonidan respublikaning barcha tuman va shaharlarida yuridik xizmat bilan ta’minlanmagan quyidagi davlat organlari va tashkilotlariga yuridik xizmat ko‘rsatilishini ta’minlash to‘g‘risidagi taklifi ma’qullansin:

- mahalla va oilani qo‘llab-quvvatlash bo‘limi;
- aholi bandligiga ko‘maklashish markazi;
- davlat soliq inspeksiyasi;
- qishloq xo‘jaligi bo‘limi;
- turizm va sport bo‘limi;
- davlat umumiy o‘rta ta’lim maktablari;
- davlat maktabgacha ta’lim tashkilotlari;
- davlat ko‘p tarmoqli va oilaviy poliklinikalar.

Axborot texnologiyalari va kommunikatsiyalarini rivojlantirish vazirligi Adliya vazirligi bilan hamkorlikda:

• 2022 yil 1 avgustga qadar ko‘rsatilgan davlat organlariga shartnoma asosida “E-huquqshunos” elektron tizimini ulash va xizmat ko‘rsatish;
  
• bosqichma-bosqich davlat umumiy o‘rta ta’lim maktablari, maktabgacha ta’lim tashkilotlari hamda ko‘p tarmoqli va oilaviy poliklinikalarni “E-huquqshunos” elektron tizimiga bepul asosda ulash va xizmat ko‘rsatish;
  
• “E-huquqshunos” elektron tizimini texnik qo‘llab-quvvatlash va maslahatlar berib borish maqsadida “call-markaz” faoliyatini yo‘lga qo‘yish choralarini ko‘radi.

“Zamin” yangiliklarini “Facebook”da kuzatib boring