"Nazarovni yomonlayversak bizdan hech qachon Buffon, Noyer kabi darvozabonlar chiqmaydi" - mutaxassis

Yurtimizda o‘tkazilgan U-23 Osiyo Kubogi bo‘yicha turli fikr va mulohazalar bildirilyapti. Ayniqsa, hal qiluvchi finalda O‘zbekistonning Saudiya Arabistoniga yutqazgani atroflicha muhokama qilinmoqda.

Ammo umumiy ma’noda jamoamiz sha’niga juda iliq fikrlar aytilayotganini eshityapmiz. Mutaxassis Bahrom Haydarov terma jamoamizning ishtiroki yuzasidan quyidagilarni aytdi.

“Yaponiya, Avstraliya kabi termalar qatnashgan turnirda bemalol finalga chiqyapmiz”
- Finalda terma jamoamiz yutqazganidan keyin muxlislar ikki guruhga bo‘lindi, deb o‘ylayman. Jamoamizni yaxshi o‘yin ko‘rsatdi, finalga chiqqani ham katta gap bo‘ldi, deyayotganlar bor. Yana boshqalar o‘z maydonida finalda yutqazib qo‘ydi, deb tanqidiy fikrlayotganlar ham bo‘lyapti. Futbolni yaxshi tushunmaydigan ishqibozlar ham bor. Nafaqat futbolda, balki sport turida ham yutadi, ham yuqazadi. Aslida finalgacha yetib kelishning o‘zi katta ish. Bu terma jamoamizdagi futbolchilarimizning kelajagi porloq. Yaxshi seleksiya qilingan, bunda murabbiyni ham mahorati bor. Hammasi to‘g‘ri bo‘lgan.

Temur Kapadzeni bosh murabbiy sifatida tayinlangani ham to‘g‘ri tanlov. O‘zining o‘yin uslubi borligini ko‘rsatib qo‘ydi. Uyda o‘ynadik va jamoamiz pala-partish emas, balki tartibli o‘yin ko‘rsatishdi. Finalda omad raqibga kulib boqdi. To‘g‘ri, ular ham mahoratini ishga solishdi. Saudiya Arabistoni Osiyo grandlaridan biri. Finalga bejizga chiqmagan. Yaponiya, Avstraliya kabi termalar ishtirok etgan turnirda biz bemalol finalga chiqyapmiz. Bu ham biz uchun o‘sish. Terma jamoamiz turnirda yaxshi qatnashdi.

“Shuncha yil Nesterov bilan yurdik, unga raqobatchi topilmadi”
- Darvozabon Vladimir Nazarovni Superliga o‘yinlarida ham kuzatganman. O‘ziga ishonchi bor. To‘g‘ri, hali yosh va bunday katta musobaqalarda qatnashmagan. Asta-sekin tajriba to‘playapti. Uni kelajakda milliy terma jamoamizning asosiy posbonlaridan biri bo‘ladi, deb o‘ylayman. Ha, xatolari bor. Lekin kamchiliklarini aytib bu yomon darvozabon ekan deyaversak, unda bizdan hech qachon Buffon, Noyerga o‘xshagan darvozabonlar chiqmaydi. Ko‘p yillar davomida Ignatiy Nesterov bilan yurdik, unga raqobatchi topilmadi. Nazarovga o‘xshagan iqtidorli posbonlarga ishonch bildirish kerak. U o‘ziga ishonyapti, qo‘rqmayapti. Xatolar esa uni yanada kuchli qiladi. Olimpiya terma jamoamizda ikkita teng kuchli darvozabon bor.

“Raqib xotirjam o‘ynadi”
- O‘yindan oldin bir narsadan qo‘rqqandim. Ya’ni, muxlislar, jurnalistlar, televideniye chempion bo‘lamiz deb bong urishdi. Bu jamoadagi 23 ta o‘yinchiga har xil ta’sir qilishi mumkin-da. Kapadze bunday turnirlarni ko‘p ko‘rgan, o‘zi ham yuqori saviyada o‘ynagani uchun futbolchilarni bemalol tayyorlay oladi, deb o‘yladim va shunday ham bo‘ldi. Baribir ruhiy jihatdan yigitlarni tayyorlagani bilan futbolchilar uchrashuv davomida doim qandaydir bosim ostida bo‘ldilar. Saudiya uchun finalga chiqqani aslida yaxshi natija bo‘lib, ularga boshqa mamlakatda yutqazib, ikkinchi o‘rinni egallagan taqdirda ham yomon natija hisoblanmasdi. Shu sababli raqib ancha xotirjam o‘ynadi.

Lekin bizni futbolchilar Saudiya Arabistonidan kuchli edi. Faqat gol o‘tkazilgach, vaqt o‘tib borgani sari jamoamiz asabiylasha boshladi. Kapadzega qoyil, Jaloliddinovni asabiylashayotganini sezib qolib, zaxiraga oldi. Asabiylik ham yigitlarga ta’sir qildi. Baribir Kapadzedan ham, terma jamoamizdan ham xursand bo‘ldim. Jamoaviy o‘yin ham bo‘ldi va qolaversa, futbolchilarimiz individual mahoratlarini ham ko‘rsatishdi. Qiyin vaziyatlardan ham chiqib ketgan paytlari bo‘ldi. Bu tarkib uzoqqa boradi.

“Erkinov ancha faol bo‘ldi”
- Barcha yigitlarimiz ham yaxshi to‘p surishdi. Lekin Hojimat Erkinov ancha faol bo‘ldi. Baribir “Paxtakor” o‘yinchisiligi, tajribasi borligi bilinib turdi. Jasur Jaloliddinov bilan Xusayn Norchayev ham qolishgani yo‘q. Diyor Xolmatovdan ko‘p narsa kutgandim. Bu yil Superligada kam o‘ynayotgani ta’sir qildi, shekilli. Holbuki, Diyor ham mahoratli futbolchi. “Zamin” yangiliklarini “Telegram”da kuzatib boring