“Qahramonlik”: rossiyalik murabbiy o‘zbekistonlik shaxmatchilarning g‘alabasi haqida

Sergey Shipov o‘zbekistonlik yosh shaxmatchilar hozirdanoq manaman degan jamoalarni ortda qoldirishga qodirliklarini ko‘rsatgani katta syurpriz bo‘lganini qayd etdi.

Rossiyalik shaxmatchi, grossmeyster, shaxmat murabbiyi, yozuvchi Sergey Shipov o‘zbekistonlik shaxmatchilarning Hindistonning Chennay shahrida o‘tkazilgan 44-Butunjahon shaxmat olimpiadasidagi natijalarini qahramonlik deb atadi.

“Bu qo‘shnilarimizning buyuk qahramonligi. Hamma ularning jamoasi g‘oyat istiqbolli ekanini bilardi. Biroq ular hozirdanoq o‘ta tajribali jamoalarni ortda qoldirishga qodirliklari katta syurpriz bo‘ldi. Barakalla”, - dedi u Sputnik muxbiri bilan suhbatda.

Hindistonning Chennay shahrida o‘tgan 44-Butunjahon shaxmat olimpiadasining so‘nggi 11-turida O‘zbekiston erkaklar terma jamoasi Niderlandiya terma jamoasi ustidan g‘alaba qozonib, olimpiada chempioni bo‘ldi. O‘zbekiston sharafini Nodirbek Abdusattorov, Nodirbek Yaqubboyev, Javohir Sindarov, Jahongir Vohidov, Shamsiddin Vohidovlar himoya qilishdi. O‘zbekiston olimpiada davomida biror marta ham mag‘lubiyatga uchramagan yagona jamoa bo‘ldi.

Prezident Shavkat Mirziyoyev chempion shaxmatchilarga shaxsan o‘zi qo‘ng‘iroq qilib, ularni samimiy tabrikladi. Davlat rahbari shaxmatchilar bu g‘alaba bilan mamlakat sporti tarixida yangi sahifani ochib berishganini ta’kidladi.

“Sizlar shu tariqa o‘zbek shaxmat maktabining shon-shuhratini yuksak bosqichga olib chiqdingiz. Sizlar kabi azmu shijoatli, vatanparvar yoshlar eng katta boyligimiz, millatimizning “oltin fondi”, desam, o‘ylaymanki, butun xalqimizning fikrini ifoda etgan bo‘laman”, - dedi Mirziyoyev.

Qayd etish joizki, 2026 yilda 46-Butunjahon shaxmat olimpiadasi O‘zbekistonda bo‘lib o‘tadi. “Zamin” yangiliklarini “Telegram”da kuzatib boring