Mirjalol Qosimov: "Quyi o‘rinlarda borayotgan jamoalar o‘z o‘rnini saqlab qolish uchun jon-jahdi bilan kurashadi"

Coca-Cola Superliganing 18-turidan o‘rin olgan "Qo‘qon-1912" - AGMK (0:0) uchrashuvidan so‘ng mehmonlar bosh murabbiyi Mirjalol Qosimov matbuot anjumanida ishtirok etdi.

O‘yin haqida
- Qiziqarli va kurashlarga boy uchrashuv bo‘ldi. Albatta, haqli durang natija qayd etildi. Birinchi bo‘limda "Qo‘qon-1912" jamoasi qarshi hujumlarda juda yaxshi harakat qildi. Shohnazar Norbekov hujumda himoya chizig‘imiz vakillariga qiyinchilik tug‘dirdi. Ikkinchi bo‘limda o‘yin tizginini o‘z qo‘limizga oldik. Bunaqa o‘yinlarda imkoniyat ko‘p bo‘lmaydi. Vaziyatlardan urish kerak. Vaqt oz qolganidan harakat tezlashadi va shundan xatolar yuzaga keladi.

- "Qo‘qon-1912"da Ivan Yosovich, Anvar Hojimirzayev, Bilolxon Toshmirzayev, Aleksandr Merzlyakovlar maydonga tushmadi. Kuchsizlangan jamoani yengish uchun AGMKga nima yetishmadi?
- Albatta gol yetishmadi. Kuchsiz demayman, quyi o‘rinlarda borayotgan jamoalar bilan har doim qiyin bo‘ladi. Ular Superligada qolish uchun jon-jahdi bilan kurashadi. Muxlislarga gol kerak, g‘alaba kerak, bizga gol yetishmadi.

- Valijon Rahimov nega 2 ta o‘yindan buyon maydonga tushmayapti?
- Unda jarohat bor.

- Keyingi turda "Paxtakor" bilan o‘ynaysizlar. Kuchli jamoaga qarshi o‘yinda yo‘qotilgan ochkolar o‘rnini to‘ldirilishiga ishonasizmi?
- Har bir o‘yinga jiddiy yondashamiz. Taqvim bo‘yicha o‘ynaymiz, g‘alaba uchun harakat qilamiz.

- "Nasaf" bilan kubok o‘yinida final uchun harakat qilasizlarmi?
- Albatta, harakat qilamiz (kuladi), axir klubdagi barcha harakatlar sovrin yutish uchun amalga oshirilayapti. Yarim finalgacha oson bo‘lmadi. Osiyo kubogi yo‘llanmasi uchun o‘yin bo‘ladi. “Zamin” yangiliklarini “Youtube”da kuzatib boring