Husain Norchayev: "Yevropaga ketmaganimning sababi..."

SPORTS.uz saytining "Dangal" loyihasida mehmon bo‘lgan Qarshining "Nasaf" jamoasi hujumchisi Husain Norchayev ko‘pchilikni qiziqtirgan savollarga javob berib o‘tdi. Qahramonimiz deyarli 50 daqiqa davom etgan suhbat davomida faoliyati haqidagi savollarga javob berdi va kelajakdagi rejalari bilan o‘rtoqlashdi. Biz ushbu suhbatdagi ayrim savollarga berilgan javoblarni yozma shaklda e’tiboringizga havola qilamiz.

Husain, Osiyo Kubogi finalida nima bo‘ldi? Nega jamoamizning o‘yini chiqmadi?

- Bilmadim, negadir o‘yinimiz chiqmadi. Vaholanki, birinchi taymda hammasini yaxshi boshlagan edik. Ikkinchi qirq besh daqiqalikda omad bizni tark etdi. To‘g‘risi, chempion bo‘lishni juda ham xohlagan edik. Hatto, g‘olib bo‘lgach, rahmatli do‘stimiz Diyorning oilasiga moddiy yordam bermoqchi edik. U23 jamoasidagi yigitlar juda ahil. Afsus, taqdirimizda shu bor ekan.

Siz akademiyadan terma jamoagacha bo‘lgan yo‘lni juda tez bosib o‘tdingiz. Bunday tez ko‘tarilishning sababi nima?

- Muvaffaqiyat ko‘proq murabbiylarning sizga bo‘lgan ishonchi bilan bog‘liq. O‘rinbosarlar jamoasida 13 ta gol kiritishim bilan asosiy tarkibdan taklif oldim. Ro‘ziqul Berdiyev meni asosiy tarkibda maydonga tushira boshladi. "Nasaf" murabbiylar shtabi o‘z futbolchilarini akademiyadan boshlab kuzatib borishi ham bunda katta rol o‘ynadi. Ular deyarli barcha yosh futbolchilarning imkoniyatini to‘g‘ri baholaydi.

Terma jamoada to‘p tepish siz uchun nimani anglatadi?

- Birinchi o‘rinda ko‘z oldingizga Vatan keladi. Shu yurt uchun jon fido bo‘lsin. Terma jamoada katta yulduzlar orasida harakat qilish oson. Tajribali futbolchilarimiz biz yoshlarni yaxshi qabul qildi. Milliy terma jamoadagi debyutimda hayajon sezmadim. Jaloliddin Masharipov va Eldor Shomurodovdek akalarim qo‘llab-quvvatlab turgan.

Kelajakda Eldor Shomurodov asosiy hujumchi bo‘lgan terma jamoamizda o‘z o‘rningizni topib keta olasizmi?

- Futbolda raqobat bor. Hamma harakat qilsa, istagan maqsadiga yetishi mumkin. Balki, taktik o‘zgarish bo‘lib, ikkita hujumchi bilan o‘ynashga to‘g‘ri kelar. Raqobat yaxshi narsa. Kim kuchli bo‘lsa, o‘sha asosiy tarkibda maydonga tushadi.

Eshitishimga qaraganda, Turk klublaridan takliflar bo‘lgan. Nima uchun bu yerda qolishga qaror qildingiz?

- Menda bir nechta takliflar bo‘lgani rost. Ayniqsa, ulardan biri ("Beshiktosh") ancha jiddiy qiziqish bildirdi. Transfer amalga oshishini o‘zim istamadim. Sababi, jamoam bilan OCHLda muvaffaqiyat qozonib, keyinroq Yevropaga yo‘l olishga qaror qildim. Nasib qilsa, shu mavsum oxirida "Nasaf"ga ma’qul keladigan variant bilan albatta xorijga yo‘l olaman. “Zamin” yangiliklarini “Telegram”da kuzatib boring