Ronaldu shov-shuvli intervyu berdi: «Manchester Yunayted» menga xiyonat qildi»

«Manchester Yunayted» hujumchisi Krishtianu Ronaldu soʻnggi yil davomida boshiga tushgan fojia, klub inqirozining sabablari, ba'zi shov-shuvli voqealar haqida intervyu berdi.

Buyuk Britaniyaning The Sun nashri jurnalisti Pirs Morgan «Manchester Yunayted» hujumchisi Krishtianu Ronaldu bilan suhbatlashib, soʻnggi yilda uning hayotida yuz bergan voqealar haqida fikrini bilib oldi.

«Soʻnggi bir necha oylarda unga malomat toshlari otilmoqda, masxara qilinmoqda va cheksiz ayblovlar qoʻyilmoqda. Endi uning sabr kosasi toʻldi. Krishtianu Ronaldu hammasidan toʻydi», deb yozdi Morgan.

Birinchi navbatda, malomat, masxara va ayblovlar ommaviy axborot vositalari, klub rahbariyati, jamoadagi sheriklari va hatto sobiq jamoadoshlari tomonidan qilinmoqda.

Eng muhimi, u 32 ta sovrinni qoʻlga kiritgan, jumladan, beshta «Oltin toʻp», Chempionlar Ligasidagi 5 ta gʻalaba, toʻrtta mamlakatda qoʻlga kiritilgan 7 ta chempionlik unvoni va Portugaliya bilan Evropa chempionati gʻolibi boʻlsa-da, elementar hurmat yoʻqligidan toʻyib ketgan.

37 yoshli Ronaldu futbol tarixidagi eng yaxshi toʻpurarlardan biri, shuningdek u yulduzlikning zamonaviy metrikasi boʻlgan «Instagram»da eng koʻp obunachilarga ega, eng mashhur odamlardan biri. Uning obunachilari soni yarim milliardga yaqinlashmoqda. Ammo hozir u gʻazab va hurmatsizlikni his qilmoqda va endi jim turmoqchi emas.

U Qatarga beshinchi va katta ehtimol bilan soʻnggi jahon chempionatiga yoʻl olishdan burun OʻZ fikrini aytishni xohlaydi. Ronaldu oʻzining professional va shaxsiy jihatdan «hayotidagi eng ogʻir damlar» deb atagan davrga oydinlik kiritishni istaydi.

«Manchester Yunayted» menga xiyonat qildi, Ten Hagni hurmat qilmayman, chunki u ham meni hurmat qilmaydi

Ronaldu «Manchester Yunayted»da oʻziga nisbatan qilinayotgan munosabatni «xiyonat»dek his etmoqda. Klubning ishi yurishmayotgan pallada oʻzini aybdor qilishayotganidan, «oq qargʻa»dek tasvirlashayotganidan achchiqlanadi va hozir uni faol ravishda klubdan siqib chiqarishmoqchi deb hisoblaydi.

U bir yil davomida klubda uch nafar bosh murabbiy oʻzgarganini aytadi. Birinchidan, Ronaldu qaytganidan bir necha hafta oʻtgach, bosh murabbiy Ole-Gunnar Sulsher ishdan boʻshatildi. Portugaliyalik uni juda hurmat qilishini aytadi. Qolgan ikki murabbiy Ralf Rangnik va hozirgi menejer Erik ten Hag haqida yaxshi fikrda emas.

Jumladan, oʻn yildan ortiq futbol jamoasini boshqarmagan Rangnik haqida shunday dedi: «Agar siz hatto murabbiy boʻlmasangiz, qanday qilib «Manchester Yunayted»ni boshqarishingiz mumkin? Men u haqda hech qachon eshitmagandim».

Ronaldu oʻtgan oyda, «Tottenhem»ga qarshi oʻyinning soʻnggi daqiqalarida zaxiradan tushishni xohlamagan edi. Shundan soʻng, bosh murabbiy ten Hag uni tarkibdan chetlatdi. Ronaldu oʻzini soʻnggi daqiqada, xuddi qandaydir oʻrinbosar sifatida maydonga tushirilishini hurmatsizlik deb baholaydi. Uning ten Hag haqidagi fikrlari keskinroq: «Uni hurmat qilmayman, chunki u ham meni hurmat qilmaydi. Agar meni hurmat qilmasangiz, men sizni hech qachon hurmat qilmayman».

Uning eng shov-shuvli tanqidchilariga kelsak, masalan, yana bir sobiq jamoadoshi Ueyn Runi bir necha oylar davomida Ronalduga ochiqchasiga hujum qilib, «Yunayted»ni undan qutulishga undaganini balandparvoz sarlavhalardan oʻrin olishga intilish deb baholaydi va bundan jirkanadi.

«Nega u meni bunchalik tanqid qilishini bilmayman... Ehtimol, u faoliyatini yakunlagani va men hali ham yuqori saviyada oʻynayotganim tufaylidir». Keyin u kulib, qoʻshib qoʻyadi: «Koʻrinishim undan yaxshiroq demoqchimasman. Lekin bu haqiqat...»

Oilaviy fojia

Shu yilning aprel oyida Ronalduning turmush oʻrtogʻi Jorjina tugʻish paytida egizak farzandining biridan ajraldi. Yurakni ezuvchi ushbu fojiada oʻgʻil bolaning egizak singlisi tirik qoldi.

Lekin, qandaydir tarzda u futbol oʻynashga kuch topdi. Bunga qisman «Liverpul» kabi raqib klub muxlislari tomonidan qoʻllab-quvvatlanishi ham sabab boʻldi. Ularga qarshi oʻyinning ettinchi daqiqasida stadiondagi muxlislar «You’ll Never Walk Alone» (Sen hech qachon yolgʻiz ketmaysan) qoʻshigʻini kuyladilar (Ronaldu 7-raqamli futbolkada oʻynaydi). Ronaldu hissiyot bilan tan oladi: «Bunday boʻlishini hech qachon kutmagandim».

Shuningdek, Buyuk Britaniya qirollik oilasi ham unga hamdardlik xatini yubordi. Bu ham uni xuddi avvalgi voqeadek hayratda qoldirdi.

Ajablanarlisi shundaki, hujumchi klubi tomonidan unchalik qoʻllab-quvvatlanmadi. Ronaldu ularni «hamdardlik» yoʻqligida ayblamoqda. Ayniqsa uch oylik qizi iyul oyida shifoxonaga yotqizilganida va Ronaldu u bilan qolishni istab, mavsumoldi mashgʻulotlariga oʻz vaqtida kelmaganida.

Krishtianu «Yunayted»ning yuqori martabali rahbarlariga nega mashgʻulotlarga vaqtida kela olmasligini tushuntirgan, ammo ular bu soʻzlardan shubhalanishgan. Ronaldu bundan «qaygʻuga tushgani»ni va «oʻzini yomon his qilgani»ni aytadi.

«Bu ertak shunday tugamasligi kerak edi», deb taajjublanadi Morgan.

«Siti» uni kutayotganida, Fergyuson fikrini oʻzgartiradi

14 oy oldin, Ronaldu shov-shuvli tarzda «Manchester Yunayted» bilan qayta shartnoma imzoladi va futbol olamini hayratda qoldirdi.

U «Yunayted»ning ashaddiy raqibi «Manchester Siti»ga yoʻl olmoqchi boʻlganida, buyuk ustozi Aleks Fergyusonning shaxsiy murojaati tufayli faoliyatini boshlagan klubiga qaytdi.

«Qalbim chaqirigʻiga quloq tutdim», deydi u qoʻlini koʻksiga qoʻyib. «U (Aleks Fergyuson) menga: «Sen «Manchester Siti»ga oʻtolmaysan», dedi va men: «Xoʻp boʻladi, boshliq», dedim».

«Orzular teatri» deb ataladigan «Old Trafford»dagi birinchi oʻyinida u «Nyukasl» (4:1) darvozasiga ikkita gol urdi. Tribunada ser Aleks va hayajondan yigʻlayotgan onasi tomonidan olqishlandi.

«Yunayted»ning xursandlikdan aqldan ozgan muxlislari oʻyindan keyin soatlab «Yashasin, Ronaldu» deb hayqirishdi.

Uning jamoadoshi Markus Reshford ijtimoiy tarmoqda: «U hech qachon ketmagandek tuyulyapti», deb yozdi.

Ammo tez orada achchiq haqiqat yuzaga chiqdi. Bu jamoa 2009 yilda tark etgan «Manchester Yunayted» klubidan juda farqli edi.

Jamoa oldinga harakat qilmagani, uni boshqarayotgan odamlar saviyasi avvalgilaridan past ekani Ronalduni hayratda qoldirdi. U mashgʻulot xonalari, basseyn, texnologiyalar, sportzaldan tortib oshxonagacha (ovqatlanish va parhez) yaxshilanmaganidan hayratga tushdi.

«Taraqqiyot nolga teng edi», deb xoʻrsindi u. «Ser Aleks ketganidan beri klubda hech qanday rivojlanishni koʻrmadim. Hech narsa oʻzgarmabdi».

Shuningdek, koʻplab yosh oʻyinchilarning mashgʻulotlarga beparvo munosabatidan hayratga tushdi.

«Agar muammo menda boʻlsa, ketishga tayyorman»

Bundan tashqari, u koʻp yillik muvaffaqiyatsizlik va turgʻunlikdan soʻng, «Yunayted» endi dunyoning eng yaxshi oʻyinchilari bilan shartnoma imzolay olmasligini bilib, hafsalasi pir boʻlgan, chunki bu ularning katta sovrinlarni qoʻlga kiritish imkoniyatlarini ancha pasaytirar edi.

«Muxlislar haqiqatni bilishi kerak», deydi u. «Men klub uchun eng yaxshisini xohlayman. Shu sababdan «Manchester Yunayted»ga keldim».

«Ammo klub ichida ba'zi narsalar borki, ular «Siti», «Liverpul» va hatto «Arsenal» kabi yuqori darajaga chiqishga toʻsqinlik qiladi... Menimcha, bunday oʻlchamdagi klub choʻqqida boʻlishi kerak va afsuski hozir unday emas».

Ronaldu noroziligining eng muhim jihati – uning magʻlubiyatni yomon koʻrishidir. U gʻalabali muhitda ishlashni xohlaydi – hozirgi «Yunayted»da esa buning borligiga ishonmaydi. Vaziyatni oʻnglash uchun keskin qadamlar kerak boʻlishi mumkin, shu jumladan uning ketishi ham.

U shunday deydi: «Pikasso aytganidek, bir narsani yaratish uchun, oldin boshqa narsani yoʻq qilish kerak. Agar ular ishni mendan boshlamoqchi boʻlsalar, bunda hech qanday muammo koʻrmayapman».

«Manchester Yunayted»ni yaxshi koʻraman, muxlislarni yaxshi koʻraman, ular doim men tomonda. Agar ular vaziyatni oʻzgartirishni xohlasalar... koʻp narsalarni, juda koʻp narsalarni oʻzgartirishi kerak», deb qoʻshimcha qildi Ronaldu.

Ser Aleksning hozirgi vaziyat haqida fikriga kelsak, Ronaldu shunday dedi: «Klub munosib yoʻlda emasligini u hammadan yaxshi biladi. U biladi. Hamma biladi. Buni koʻrmayotgan odamlar... shunchaki koʻrishni istamayapti, ular koʻr».

«Ronaldu bu intervyudan oldin yaxshilab oʻylab koʻrgan»

Pirs Morgan birinchi marta Krishtianudan uch yil oldin, Italiyaning Turin shahrida, «Yuventus»da oʻynab yurganida intervyu olgan edi.

«Biz toʻrt soat davomida suhbatlashdik. Shu vaqtdan beri biz juda kam uchrashdik, lekin qalin doʻst boʻlib qoldik. Biz koʻp yozishamiz va gaplashamiz va u har doim men bilan juda rostgoʻy. U juda aqlli, yoqimtoy yigit, bu intervyuni berishdan oldin juda koʻp oʻylagan», deydi u.

Jurnalistning fikricha, koʻp oylar davomida Ronalduning ichida gʻazab va umidsizlik boʻlgan. U futbolga jiddiy yondashadi, gʻalabalarga esa bundan ham jiddiy.

Ronaldu qoʻlga kiritgan mukofotlar kuchli va bardoshli mentalitetni, tinimsiz mehnatsevarlikni, shiddatli raqobat ruhi va dunyoda birinchi raqam ekaniga boʻlgan murosasiz ishonchni talab qiladi.

«Ronaldu yuqori darajada kurashmaydigan klubga kelib qolgani, zaxiraga oʻtqazib qoʻyishgani, haqorat qilishgani, hatto faoliyatida birinchi marta tarkibdan chetlatishgani tufayli qattiq zarbaga uchragandek tuyulishi mumkin. Chunki oʻtgan mavsumda u 24 ta gol bilan klub toʻpurari boʻlgandi. Lekin u hech qanday alohida munosabatni talab qilmaydi, ammo hurmat koʻrsatilishini istaydi, chunki bunga loyiqman deb hisoblaydi», deb ta'kidlaydi Morgan.

Intervyu yakunida, Jorjina shovqin-suronli bolalari bilan kelib qoldi. Ular Krishtianuning oyoqlariga yopishib olishdi. Ronalduni bolalari bilan koʻrish – bu quvonchli, u xuddi ona kabi ularga mehr ulashadi.

U shunday deydi: «Oilam men uchun hamma narsadir. Ayniqsa, boshimizga tushgan fojiadan keyin bu yanada muhim».

Avvalroq, u hayotdan koʻz yumgan oʻgʻli haqida kamera oldida hayajonlanib gapirdi, bundan boʻgʻilib qoldim. Lekin u odamlarning oʻziga achinishini istamaydi. U ajoyib oilaga ega, juda badavlat va Xudo bergan iqtidorga ega odam ekanini, bu iqtidor uni sport tarixidagi eng muvaffaqiyatli va mashhur inson qilganini yaxshi tushunadi.

U odamlardan achinish emas, balki bu yil boshidan kechirganlarini tushunishlarini va bu voqealarni notoʻgʻri mish-mishlar orqali emas, balki bevosita oʻzidan eshitishini xohlaydi.

Ronaldu koʻpriklarni yoqmoqdami?

«Bu doston qanday yakunlanganishini bilmayman. Bu intervyudan keyin Krishtianu Ronaldu qanday qilib «Manchester Yunayted»ga qaytishini tasavvur qilolmayman», deb yozdi Morgan.

Ammo hozircha u bor e'tiborini jahon chempionatiga qaratib, «Portugaliya uchun gʻalaba qozonish»ni istaydi, soʻngra, qaytib kelib, «Yunayted» bilan muammolarini hal qilmoqchi.

Nima boʻlishidan qat'i nazar, u har doim klub va ayniqsa uning muxlislari bilan birga boʻlishini tushuntirdi.

«Chunki bu futboldagi eng muhim narsalar. Men ular uchun oʻynayman. Ular doim men tomonda. Har safar koʻchaga chiqqanimda, koʻchada yurganimda muxlislar yonimga kelishini va futbol uchun qilgan ishlarimni qadrlashini his qilaman.

Muxlislar men uchun hamma narsadir. Shuning uchun bu intervyuni beryapman, chunki men oʻz fikrimni aytish uchun qulay vaqt kelganini his qilyapman», dedi Ronaldu. “Zamin” yangiliklarini “Telegram”da kuzatib boring