Shomurodov transferiga bir qadam qoldi!

Eldor Shomurodov yanvarda Rimni tark etadigan ko‘rinadi. Joze Mourino qo‘l ostida o‘yin amaliyotisiz qolib ketayotgan hujumchi omadini boshqa klubda sinab ko‘rishi kutilmoqda.

Italiyaning futbolni yorituvchi o‘ndan ziyod nashrlari o‘zbek hujumchisi tez orada Turin klubida faoliyat boshlashini ta’kidlamoqda.

Xususan, “Roma”dagi yangiliklarni yoritib kelayotgan https://romapress.net sayti jurnalisti Endi Mattioli o‘z manbalariga tayanib, Shomurodov “Torino”ga o‘tishiga bir qadam qolganini ma’lum qildi.

So‘nggi xabarlarga qaraganda, “Torino” hujumchilaridan biri Petro Pellegri jarohat olib, uzoq muddatga safdan chiqdi. Bu holat shundoq ham oldingi chiziqda katta muammolarni bartaraf etishi kerak bo‘lgan jamoa oldiga qo‘shimcha qiyinchiliklarni qo‘ymoqda. Qolaversa, italiyalik hujumchining jarohatlarga moyilligi klub rahbariyatidan bu masalaga jiddiy e’tibor qaratishni talab qilyapti.

Turin klubi hujumdagi kamchiliklarni Eldor Shomurodov orqali yopmoqchi va vujudga kelgan vaziyatni inobatga olib, turinliklar “Roma” bilan muzokaralarni yanada jadallantirdi.

Yana bir nufuzli manba - Sky Sport nashri Eldor Shomurodovning o‘zi ham “Torino”ga ko‘chib o‘tishni istayotganini va transferga tayyorligini tasdiqladi.

Aslida “Torino” yozgi transferlar vaqtida ham o‘zbek legionerini so‘rab, “Roma”ga murojaat qilgan edi. Biroq yarim yil avval turinliklar bu rejani amalga oshira olmagan.

Hozir “Roma”da vaziyat o‘zgargan. Joze Mourino oldingi chiziqda asosan Temmi Abraxam, Andrea Belottiga ishonch bildirmoqda. Paulo Dibala ham og‘ir jarohatdan qutilib, safga qaytdi. Stefan El-Shaaravi o‘rtoqlik uchrashuvlardagi gollari bilan Joze Mourino ishonchiga kirib olishni uddaladi.

Tez kunlarda tarkibga “Budyo-Glimt”dan olingan hujumchi Ola Solbakken qo‘shiladi. Bundan tashqari, Joze Mourino oldingi chiziqqa “Barselona”ga sig‘may qolgan Memfis Depayni olib kelish bo‘yicha ish boshlagan.

Tabiiyki, bu holatda Eldor Shomurodov zaxiraga mixlanib qoladi. Shundoq ham portugaliyalik bosh murabbiy o‘z vaqtida barcha hujumchilardan yaxshi sport formasida bo‘lganini namoyish qilgan futbolchimizga yetarli imkoniyat bergani yo‘q. Mavsum boshlanganidan beri sakkizta uchrashuvda qatnashgan Eldor jami 151 daqiqa maydonda harakat qildi xolos.

Umumiy statistikada ham shu ahvol. Eldor Rimga kelganiga bir yarim yil bo‘ldi. Shu paytga qadar jami 48 ta uchrashuvda qatnashib, oltita gol va yana shuncha assist qayd etdi. Lekin bu o‘yinlarning aksariyatida hamyurtimiz zaxiradan maydonga tushib, bir necha daqiqada to‘p tepgan xolos.

Transfer mutaxassislarining ta’kidlashicha, Yevrokuboklar yo‘llanmasi uchun kurashayotgan “Torino”da tanlov imkoni kam. Turinliklar Shomurodovni qo‘lga kiritish uchun rimliklarning talabiga ko‘nishga majbur.

“Roma” sport direktori Tyagu Pinto barcha xaridorlarga bitta talab qo‘ygan: Shomurodovdek hujumchi kerakmi – 10 million yevro to‘lang!

Agar “Torino” bu transferni uddalay olmasa, Shomurodovni “Fiorentina”, “Kremoneze” va “Sampdoriya” kabi klublar kutib turibdi. “Zamin” yangiliklarini “Odnoklassniki”da kuzatib boring