Anchelotti va Xavi matbuot anjumanini "yondirdi" yoxud "Real" finalga tayyor, "Barsa" esa qasos olmoqchi

Ispaniya superkubogi final o‘yini doirasida "Real" va "Barselona" jamoalari bugun Saudiya Arabistonida o‘zaro to‘qnash keladi. Bellashuv 00:00 da start oladi.

Mazkur bahs oldidan ikki jamoa bosh murabbiylari matbuot anjumanida ishtirok etdi. Biz sizga dastlab "qaymoqranglilar" bosh murabbiyi Karlo Anchelottining fikrlarini taqdim etamiz.

Karlo Anchelotti: "Himoya - bizning eng katta muammomiz. Bu haqda oldin ham gapirgandim. "Valensiya"ga qarshi o‘yinda aynan himoyachilarimizning xatosi sabab gol o‘tkazib yubordik. Umid qilamanki, "Barselona" bilan bunday holat kuzatilmaydi.

- Biz uchun barcha sovrinlar qadrli. Bugungi finalga ham bor kuchimizni tashlaymiz. Bu siz o‘ylaganingizdan ko‘ra ahamiyatliroq bahs. "Barselona" bizdan ko‘ra ko‘proq g‘alaba qozonishni istayapti? Yo‘q, bu gapga qo‘shilmayman. O‘zimizga ishonamiz va yana bir sovrinni qo‘lga kiritishga umid qilamiz.

- Xavining maydon holati yomon ekani haqidagi fikriga qo‘shilmayman. Stadion yaxshi holatda.

- Benzema yana avvalgi darajasiga chiqdi. U finalga tayyor va mavsumning qolgan qismida biz bilan birga bo‘ladi. Jarohatlar bo‘lmasligini hamma kabi men ham istayman, albatta! Vaskes bugun aynan shu narsa sabab uchrashuvni o‘tkazib yuboradi, Militao muammosiz mashg‘ulotlarda ishtirok etdi. Modrich va Kroos ham "el-klasiko"ga shay holda.

Undan so‘ng matbuot anjumani "ko‘k-anorranglilar" bosh murabbiyi Xavi bilan davom ettirildi. Mutaxassis esa raqib va bugungi final bellashuvi borasida quyidagi fikrlarni ilgari surdi:

Xavi: "Biz ozroq hayajondamiz. Buni tan olaman. Agar bu finalda g‘alaba qozonsak, mazkur sovrin bilan mavsumning qolgan qismi butkul o‘zgarib ketishi mumkin. "Real"ning juda kuchli ekanini alohida ta’kidlayman.

- Ruhiy tomonlama raqib biroz ustunlikka ega. Sababi, ular ko‘p marta finallarda o‘ynab kelmoqda. Biz esa anchadan beri bu kabi hal qiluvchi o‘yinlarda ishtirok etmadik. Bu safar yutishimiz shart. Kubokda g‘olib bo‘lmagan ko‘plab futbolchilarimiz borligi biz uchun foyda bo‘lishi ham mumkin. Chunki bu yigitlar uchun bugungi "el-klasiko" katta imkoniyat.

- Oxirgi to‘qnashuvdan bu safargisi farq qiladi, albatta. Bizda bu safar yo‘qotishlar deyarli yo‘q va bu o‘z ta’sirini ko‘rsatadi. O‘z o‘yinimizni namoyish etish, himoyada ularning hujumchilarini zararsizlantirishga harakat qilamiz. Biz o‘tgan mavsumdagi mag‘lubiyat uchun "revansh" olishni xohlaymiz.

- Birinchi golning ahamiyati yuqori. Ammo unga erishish hech qachon oson bo‘lmaydi. Ayniqsa, raqibingiz "Real"dek jamoa bo‘lsa.

- "Barselona" singari katta klubda ishlashning bosimi o‘ta yuqori. Sababi, jamoaning milliardlab muxlislari bor desam, adashmayman. Bu men uchun yoqimli jarayon. Ishlashda davom etishimiz kerak. shu bilan birga, tanqidlarga muvaffaqiyatlarimiz bilan javob berishni istayman.

Ma’lumot o‘rnida, final bahsi bugun tungi soat 00:00 da start oladi. Uchrashuv Saudiya Arabistonining Ar-Riyod shahrida bo‘lib o‘tadi.

“Zamin” yangiliklarini “Telegram”da kuzatib boring