Coca-Cola Superligasi uchinchi turidan o‘rin olgan "Paxtakor" va "Navbahor" (2:1) o‘rtasidagi markaziy uchrashuvidan so‘ng mezbonlar ustozi Maksim Shatskix matbuot anjumanida qatnashdi.
- O‘yin haqida
- Hammaga xayrli kech. O‘yindan oldin barcha kutganidek, haqiqiy derbi bo‘ldi. O‘zining emotsiyalari, gollari bilan shunday bo‘ldi ham. Ilk navbatda biz muxlislar uchun o‘ynaymiz. O‘ylaymanki, ular bizdan rozi bo‘lishdi.
- Jamoa bugun mavsumda ilk bor 3 nafar markaziy himoyachi bilan o‘ynadi. Bunga sabab taktikangizga futbolchilar yetishmaganimi yoki "Navbahor" kuchli ekanligi uchunmidi?
- "Navbahor"ning kuchliligi uchun emasligi aniq (kuladi). Hayratlanmang, keyingi o‘yin umuman boshqa taktika va sxema ostida kechishi mumkin. Barchasi futbolchilarning kuchli va zaif jihatlariga, umumiy holatiga bog‘liq bo‘ladi. Har bir uchrashuv uchun strategiya tuzamiz. Kim bilan o‘ynashimizni farqi yo‘q, raqibni to‘liq o‘rganib chiqamiz. Barchasini o‘rganib chiqqan holda raqibga nima taklif qilishimizni va raqiblarning kuchli jihatlarini kuchsizlantirishni reja qilamiz.
- Siz har doim to‘g‘risini aytasiz. Bugungi hakamlikka necha baho qo‘ygan bo‘lardingiz?
- Mening gaplarimni hurmat qilishingizdan xursandman. Men o‘zim uchun haqman. Hakamlarga baho qo‘ymagan bo‘lardim. Hammaning o‘z vijdoni bor. Barchasini hakamlar qo‘mitasiga qoldiramiz. Ular ushbu o‘yinni tomosha qilishadi. To‘g‘risini aytaman, takroriy lavhalarni ko‘rdim. Menimcha, birinchi penalti yo‘q edi. Ikkinchi penaltida esa jarima maydonchasi ichida futbolchilar ko‘p edi. Nimanidir aniqlash qiyin bo‘ldi. Barchasini qo‘mitaga qoldiramiz.
- "Paxtakor" avvalgi turlarga qaraganda kuchliroq o‘ynadi. O‘tgan turlarda jamoaga nima yetishmadi, bugun jamoa nimaning evaziga zafar quchdi?
- Biz yutganimizning o‘zi oldingi turlardan kuchliroq o‘ynaganimizni anglatadi. Umuman olganda ko‘p narsa o‘zgargani yo‘q, asosiysi tablodagi raqamlar bo‘ldi. Ko‘p kombinatsiya qilib, xavfli hujumlar tashkil etib, gol ura olmasligingiz ham mumkin. Bu hech kim uchun yoqimli emas. Bugungi bahs biz uchun juda muhim edi. Ammo ko‘pchilik tushunib turibdiki, ushbu g‘alabadan keyin kelgusi ishlarimiz yaxshilanib boradi. Navbatdagi o‘yinga tayyorgarlikni boshlaymiz. Ertaga o‘tgan o‘yinlardagi mag‘lubiyatni yoddan chiqarishadi. Yigitlar termaga chaqirilishgan. Asosiysi ularning sog‘lom qaytishi bo‘ladi.
- Rashidovning zaxirada qoldirishi nima bilan bog‘liq?
- Bu jismoniy tayyorgarlikdan kelib chiqib qilindi. Bizga yetib kelguncha deyarli 2 oy shug‘ullanmagan. Shunday bo‘lishi ham kerak edi. Uning holatini tiklab borishga urinyapmiz. Termadagi futbolchilarimiz qaytguncha, u ham jismonan, ham ruhan tayyor bo‘lib qolsa kerak va biz boshqa Rashidovni ko‘ramiz degan umiddaman.
- Yoshlar termamiz jahon chempionatiga yo‘llanma oldi. Bu yaxshi, ammo endi 8 futbolchisini JCHga jo‘natgan holda "Paxtakor" endi 3-4 oylik reja tuzadimi?
- Bu biz uchun haqiqiy muammo. Buni birinchi marta ta’kidlamayapman. "Paxtakor"dan barcha yoshdagi termalarga umumiy 38 nafar kishi jalb qilinadi. Bu balki yaxshidir, "Paxtakor" termalarning homiysidek. Futbolchilarga ham bu yaxshi. Ular uchun terma asosiy maqsad va shu orqali ko‘tarilishni istaydi. Hayot shunaqa. Biz qaydnoma tayyorlaganimizda buni hisobga olamiz. Ammo chegarasiz ravishda futbolchilarni ro‘yxatdan o‘tkazib bo‘lmaydi. Balki U-20 termamizdagi barcha futbolchilar ham asosiy tarkibda o‘ynamas, biroq ular yaqin vaqtlardagi asosiy jamoaning zaxirasi bo‘ladi. Ular istalgan vaqtda asosiy tarkibda ham zaxirada ham bo‘lishga tayyor. Albatta, U-20 termamiz to‘rtlikka kirgani va finalga chiqqanidan juda xursand bo‘ldim. Jahon chempionati qiziqroq. U yerda boshqa maktablar, akademiyalar fonida kuchlimizmi yoki yo‘qligini bilib olamiz. Afrika, Osiyo, Yevropa kabi qit’alar vakillari bilan kuch sinashish orqali darajamiz ochiladi. Biz to‘g‘ri yo‘nalishdamizmi yoki yo‘q bilib olamiz.
- Diyor Xolmatovni asosiy tarkibda tushirdingiz. Uning darajasi o‘yinga mos keldimi?
- U yaxshi o‘yin o‘tkazdi. Birinchi taymda katta ish qildi, shunchaki zaxiradagilarga imkon berib, o‘yinimizni yanada kuchaytirishimiz lozim edi. Chunki 90 daqiqa mobaynida hech qaysi futbolchi o‘zining tezkor o‘yinini ko‘rsata olmaydi. Unga bugun e’tiroz yo‘q. U talablarimizni bajarishga harakat qildi. Ammo umid qilamanki, navbatdagi o‘yinlarida u hujumda yanada agressivroq o‘ynaydi. U qo‘lidan kelganicha o‘ynadi, unga ofarin deb qolaman.
“Zamin” yangiliklarini “Facebook”da kuzatib boring
