“Spetsiya” A Seriyaning 30-turida o‘z muxlislari ko‘z o‘ngida musobaqa jadvalida ikkinchi o‘rinda borayotgan “Latsio” bilan kuch sinashadi. Yuqori divizionda jon saqlab qolish uchun kurashayotgan liguriyaliklar uchun har bir ochko o‘ta muhim. Shu bois, rimliklarga qarshi bellashuv ham katta ahamiyatga ega.
“Spetsiya” bosh murabbiyi Leonardo Semplichi bo‘lajak o‘yin oldidan fikr-mulohazalarini bildirib, Eldor Shomurodov haqida ham to‘xtalib o‘tdi.
O‘yin haqida
Biz futbolchilar bilan “Salernitana” va “Fiorentina”ga qarshi kechgan avvalgi ikki o‘yin haqida gaplashdik. “Latsio”ga qarshi bahsda ham xuddi ana shunday shiddatli o‘yin kutaman. Bunaqa jamoalar bilan to‘qnash kelganda ancha ter to‘kishga to‘g‘ri keladi. Lekin futbolchilar mening g‘oyalarimni maydonda namoyish eta olayotganidan, salohiyatimizni amalda ko‘rsatayotganidan xursandman.
Menga kurashuvchan jamoani ko‘rish huzur bag‘ishlaydi. Bu katta maqsad sari intilayotgan jamoa uchun muhim xususiyat. O‘zimizga bo‘lgan ishonch bo‘lajak bahsda ham bizga qo‘l kelishi kerak.
Tarkibdagi muammolar haqida
Hamon bir necha futbolchilarimiz xizmatidan to‘liq foydalana olmaymiz. Shimon Jurkovski va Kevin Agudelo mashg‘ulotlarga qo‘shildi. Viktor Kovalenko ham shug‘ullandi, lekin tayyorgarligi yuqori darajada emas. Arkadiush Retsa ham bir haftadan beri formasini tiklashga urinmoqda. Xolm uchun mavsum tugagan. Mattia Kaldara va Daniel Maldinida ham ayrim muammolar bor.
Men qo‘l ostimda bo‘lgan va uchrashuvda qatnashishga tayyorlar haqida gapirishni ma’qul ko‘raman. Chunki “Latsio” ga qarshi bahsda aynan ularni o‘ynataman. Men shiddatli o‘yin tarafdoriman. Raqibimiz o‘ta kuchli, biz esa ularga muammo tug‘dirishga tayyormiz. Raqibni hurmat qilamiz, lekin maydonda nimalarga qodirligimizni ko‘rsatishimiz shart.
Shomurodov haqida
"Fiorentina"ga qarshi o‘tgan o‘yinda Eldor Shomurodov birgina zarba bilan musobaqa jadvalidagi barcha vaziyatni o‘zgartirib yuborishi mumkin edi. Lekin o‘zbek futbolchisi xatoga yo‘l qo‘ydi.
Eldor bir hafta davomida boy berilgan imkoniyatni unutish uchun juda qattiq mehnat qildi. Eng muhimi, butun jamoa va klub xodimlari bunday xato hammada ham uchrashi mumkin ekanini to‘g‘ri tushundi. Biz ham Eldorning yonida turdik.
U xato qildi, lekin uzr so‘radi. Endi faqat oldinga intilishimiz kerak. Oldinda Shomurodov faoliyatida yana hal qiluvchi vaziyatlar, albatta, yuzaga keladi.
Eldor, odatdagidek, mashg‘ulotlarda juda yaxshi shug‘ullandi. Bu juda muhim jihat. Jamoadagi boshqa futbolchilar ham Shomurodovning o‘tgan o‘yin oxirida yuz bergan yoqimsiz holatni esga olishiga yo‘l qo‘ymadi.
“Latsio” haqida
“Latsio” zo‘r formada. Biz bilan bo‘ladigan o‘yinga “Yuventus”ni yutib kelishdi. Bu jamoaning nozik nuqtalarini topish juda qiyin. Bosh murabbiy Mauritsio Sarri rimlik futbolchilarga o‘z g‘oyalarini va mentalitetini to‘liq singdirib bo‘lgan.
“Latsio”ning himoya chizig‘i ligada eng kuchlilardan. Raqib qudratli ekaniga qaramasdan, o‘yinda ularni jazolash uchun vaziyatlar bo‘ladi. Natijaga erishish uchun to‘p nazoratini o‘zimizda ushlab turishimiz, “Latsio”ning harakatlarini cheklab qo‘yishimiz kerak. Bu ijobiy natijaga erishishda muhim omil.
“Spetsiya” va “Latsio” o‘rtasidagi uchrashuv 14 aprel kuni Toshkent vaqti bilan 23:45 da boshlanadi.
“Zamin” yangiliklarini “Youtube”da kuzatib boring
