Timur Kapadze: "Fayzullayev, Rahmonaliyev va Husanov kabi futbolchilarimizning jamoada o‘z o‘rni bor"
Osiyo o‘yinlari guruh bosqichidan o‘rin olgan Gongkong - O‘zbekiston bahsi bo‘lib o‘tdi. Uchrashuv vakillarimizning minimal 0:1 hisobidagi g‘alabasi bilan yakunlandi. Mazkur o‘yindan so‘ng Timur Kapadze o‘z fikrlari bilan o‘rtoqlashdi.
"Assalomu alaykum, g‘alaba bilan hammani tabriklayman! Qiyin uchrashuv bo‘ldi. Ko‘p faktorlar o‘z ta’sirini ko‘rsatdi baribir, yomg‘ir ham tingani yo‘q. Shu sabab to‘p bilan muomala qilishda qiyinchilikka duch keldik.
Gongkongga esa bu qo‘l keldi. Chunki ular uzun paslar evaziga va qarshi hujumlarga tayanib, harakat qildi. Shunga qaramasdan, bizda ikki taymda ham yaxshi imkoniyatlar bo‘ldi. Afsuski, ularning ko‘pidan foydalana olmadik.
Raqibda tarkib tomonlama o‘zgarishlar bo‘lganini ko‘rdik. Milliy termadan futbolchilar chaqirilgan va yoshlardan eng kuchlilari jalb etilgan. Biz uchun foydali va qiziqarli o‘yin bo‘ldi, albatta.
Ikki kundan so‘ng yana shu jamoa bilan o‘ynaymiz. Unda boshqa yigitlarga ham imkon berish ko‘zda tutilgan. Guruhdan chiqishimiz hal bo‘lgan, faqat oldimizda birinchi o‘rin masalasi turibdi. O‘ylaymanki, hammasi ijobiy yakunlanadi.
Fayzullayev, Rahmonaliyev va Husanov kabi futbolchilarimizning jamoada o‘z o‘rni bor. Ular iqtidorli va yuqori salohiyatga ega yoshlarimizdan hisoblanadi. Yigitlar har bir jamoani kuchaytira oladi.
Ular bo‘lganda, biz yanada kuchliroq bo‘lardik. Shunga qaramay, ushbu futbolchilarning o‘rnida harakat qilayotganlar ham yomon taassurot qoldirmayapti.
Zaif joyimiz yo‘q, deb o‘ylayman. Maqsad qo‘yganmiz va maqsad sari olg‘a yuramiz!
Biz Suriya yoki Afg‘oniston bilan o‘ynash uchun kelmagandik. To‘g‘ri, ularga qarshi bahs uchun tayyorgarlik ko‘rilayotgandi. Ammo ular ishtirok etmasligi ma’lum bo‘ldi. Umuman olganda, oldimizda qanday raqib bo‘lishidan qat’i nazar g‘alaba uchun maydonga tushamiz", - dedi mutaxassis.
“Zamin” yangiliklarini “Telegram”da kuzatib boring
