Osiyo Chempionlar ligasining 2-turidan o‘rin olgan "Al Fayxa" — "Paxtakor" uchrashuvidan avvalgi matbuot anjumanida "Al Fayxa" bosh murabbiyi Vuk Rasovich va himoyachi Muhammad al Baqavi ishtirok etdi.
Rasovich: "Maqsadimizga erishish uchun "Paxtakor"ga qarshi bahsda tavakkal qilishimizga to‘g‘ri keladi. Ushbu muhim uchrashuvda futbolchilarimizga ishonaman. Biz O‘zbekistonning eng kuchli klublaridan biri bilan to‘qnash kelamiz. Ularning o‘tgan o‘yinini tomosha qilib, shunday xulosaga keldimki, jamoa 1-turda "Al Ayn"ga yutqazishga loyiq emasdi.
Qit’a musobaqasida uzoqroqqa borish niyatidamiz, bu yo‘lda esa "Paxtakor"ga qarshi o‘yin o‘ta muhim sanaladi. Bizda bir qator jarohat olgan o‘yinchilar mavjud, shu bois ertangi o‘yinda kimlar ishtirok etishi to‘g‘risida bosh qotirishga to‘g‘ri keladi", dedi serbiyalik mutaxassis.
Al Baqavi: "Bo‘lajak uchrashuv muhim ahamiyat kasb etishini his qilib turibmiz. Raqibni hurmat qilgan holda uch ochkoni qo‘lga kiritishimiz lozim. Albatta, o‘yinlardagi charchoq va bosim bizga qo‘shimcha yuk bo‘lmoqda. Sababi, biz uchta musobaqada qatnashyapmiz. Ertangi o‘yinda muvaffaqiyatli natija uchun bor kuchishimizni ishga solishga harakat qilamiz", dedi saudiyalik himoyachi.
“Zamin” yangiliklarini “Facebook”da kuzatib boring
