Italiya A Seriyasi sakkizinchi turida eng qiziqarli uchrashuvlardan biri “Kalyari” va “Roma” o‘rtasida bo‘ladi.
Bu bahs futbol olamida o‘z o‘rniga ega bo‘lgan ikki mashhur murabbiy – Klaudio Ranyeri va Joze Mourinyoning o‘zaro raqobati sifatida muxlisu mutaxassislar diqqat markazida turibdi.
“Kalyari” ham, “Roma” ham bu mavsum ancha bo‘sh o‘ynayapti. Sardiniyaliklar hali g‘alaba qozonmagan, yettita o‘yindan faqat ikki ochko jamg‘ara olgan xolos. Klaudio Ranyeri shogirdlari musobaqa jadvalida eng oxirgi pog‘onada turibdi. Tajribali murabbiy bu holatdan chiqib ketish yo‘llarini qidirmoqda.
“Roma”ga barqarorlik yetishmayapti. Joze Mourinyo shogirdlari bir o‘yinda yirik hisobda g‘alaba qozonib, ayrim uchrashuvlarda kutilmagan o‘z darvozasidan ko‘p o‘tkazib yuboryapti. Chempionlik va UYEFA chempionlar ligasi yo‘llanmasi uchun kurashishi kutilgan “Roma” sakkiz ochko bilan autsayderlarga yaqin joylashib olgan.
Oltinchi turda “Roma” A Seriya debyutanti – Eldor Shomurodovni rimliklar 18 million yevroga pullagan “Jenoa”ga to‘qnash kelib, o‘yinda 1:4 hisobida mag‘lubiyatga uchragan edi. Italiya matbuotining yozishicha, klub xo‘jayini Den Frnkin o‘sha mag‘lubiyatdan keyin Joze Mourinyoni haydab yuborishga qaror qilgan. Biroq sport direktori Tiagu Pinto oraga aralashib, hamyurtiga ozgina imkon berishni so‘radi.
Corriere dello Sport nashrining maʼlumotiga ko‘ra, Mourinyoning isteʼfosi kun tartibidan olingani yo‘q. Garchi avvalgi turda rimliklar “Frezinone”ni 2:0 hisobida yurgan bo‘lsa-da, Sardiniyada bo‘ladigan o‘yin Mourinyo uchun hal qiluvchi bo‘lishi kutilyapti.
Portugaliyalik mutaxassisning o‘zi ham isteʼfoga tayyor ko‘rinadi. Mourinyo buni gap orasida qistirib o‘tdi.
- Hozir bor eʼtiborimni “Roma”ga qaratganman. Bor kuchimni oxirigacha sarflayman. Kelajakni hech kim bashorat qila olmaydi. Lekin men Saudiya Arabistonida murabbiylik qilishimga aminman.
Saudiyada milliy chempionat rivojlanyapti. Bu Krishtianu Ronaldu effekti. U mashhur yulduzlardan birinchi bo‘lib, u yerga bordi va futbol olamidagi tendensiyani o‘zgartirib yubordi. Saudiya ligasida raqobat bor, chunki u yerga mahoratli futbolchilar kuchga to‘lgan paytida yo‘l olmoqda, - dedi Joze Mourinyo.
“Kalyari” va “Roma” o‘rtasidagi uchrashuv A Seriyadagi yagona vakilimiz Eldor Shomurodov uchun ham alohida ahamiyat kasb etadi. Chunki legionerimiz hamon “Roma” o‘yinchisi hisoblanadi. “Kalyari”da mavsum oxirigacha ijarada o‘ynaydi.
Shomurodov bir o‘yinda har ikki murabbiyga o‘z salohiyatini ko‘rsatib qo‘yishi kerak. Buning uchun bu bahsdan yaxshi imkoniyat bo‘lmaydi.
“Kalyari” bosh murabbiy Klaudio Ranyeri bu gal tarkibda katta o‘zgarishlar qilishga vaʼda bergan. Bir necha nashrlar oldingi chiziqda Gaetano Oristanioga imkoniyat berishini taʼkidlamoqda. Ikkinchi hujumchi o‘rniga uch futbolchi – mavsumga tayyorgarlikni kech boshlagani uchun hamon yuqori sport formasiga chiqa olmayotgan Eldor Shomurodov, mushakdagi jarohatlari bezovta qilgan Andrea Petanya va Leonardo Pavoletti. Ularning birortasi hali gol ura olmagan. Murabbiylar shtabi yosh Oristanioning yonida tajribali shu uch futbolchidan birini ilk daqiqalardan o‘ynatishi kerak.
“Kalyari”ning mavsumdagi ikki goliga mualliflik qilgan Zito Luvumbo o‘tgan turni o‘tkazib yubordi. Mutaxassislarning taʼkidlashicha, uning ham jismoniy holati hali 90 daqiqani faol o‘tkazishga yetmaydi.
“Kalyari” va “Roma” uchrashuvi 8 oktyabr kuni Toshkent vaqti bilan 21:00 da boshlanadi.
“Zamin” yangiliklarini “Vkontakti”da kuzatib boring
