Rossiya futbolini kuzatib borayotgan braziliyalik jurnalist Fabio Aleysho Rossiya Premer-ligasining birinchi davrasi yakunlari bo‘yicha o‘z tahlillari natijasini e’lon qildi.
Tajribali jurnalist yuqori diviziondagi jamoalarda eng yaxshi natijalarni qayd etgan futbolchilardan iborat ramziy terma jamoa tuzdi. Bundan tashqari, Fabio Aleysho individual nominatsiyalar bo‘yicha ham charm to‘p ustalari ishtirokini baholadi. Ro‘yxatdan Abbosbek Fayzullayev ham o‘rin oldi.
Braziliyalik jurnalist o‘zi eng kuchli, deb bilgan futbolchilardan quyidagi ramziy terma jamoani tuzdi.
Darvozabon: Matvey Safonov (“Krasnodar”).
Himoyachilar: Sergey Volkov, Xunior Alonso (“Krasnodar”), Villian Rosha (SSKA), Duglas Santos (“Zenit”).
Yarim himoyachilar: Aleksandr Chernikov, Eduard Spersyan (“Krasnodar”), Vendel (“Zenit”), Benxamin Garre (“Krilya Sovetov”).
Hujumchilar: Jon Kordoba (“Krasnodar”), Mateo Kasserra (“Zenit”).
Bosh murabbiy: Igor Osinkin (“Krilya Sovetov”).
Individiual nominatsiyalar bo‘yicha Fabio Aleyshoning tanlovi quyidagicha ko‘rinish oldi:
Birinchi davraning eng yaxshi o‘yinchisi: Eduard Spersyan (“Krasnodar”).
Hammani hayratga solgan futbolchi: Abbosbek Fayzullayev (SSKA).
Ishonchni oqlamagan o‘yinchi: Klaudino («Zenit»).
Shuningdek, Rossiya futboli ekspertlari, sobiq futbolchilar, murabbiylar ham birinchi davrada o‘zini ko‘rsatgan charm to‘p ustalari qatorida ligada debyutini muvaffaqiyatli boshlagan Abbosbek Fayzullayev o‘yiniga baho bermoqda.
Igor Semshov, “Chayka” bosh murabbiyi:
Birinchi davrada eng yorqin o‘ynaganlardan “Krilya Sovetov”dagi Nikita Saltikov bo‘ldi. Aslida bu futbolchi birinchi ligada “Akron” safida ham o‘zini ko‘rsatgan edi. Abbosbek Fayzullayev ham SSKAda o‘zini yaxshi tomondan namoyish qila oldi. “Rostov”dagi Vaxaniyani ham ular qatoriga qo‘shish mumkin.
Vitaliy Dyakov, “Dinamo” va “Rostov” jamoalari sobiq futbolchisi:
Ko‘pchilik Fayzullayevni birinchi davraning asosiy kashfiyoti bo‘lganini aytyapti. Men ham ularning fikriga to‘liq qo‘shilaman. Abbosbek SSKAga juda yaxshi kirishib ketdi. Fayzullayevning texnikasi kuchli va buni uning ustun tomoni sifatida ko‘rsatish mumkin.
Vyacheslav Chanov, futbol eksperti:
Chempionatning birinchi davrasida eng katta taassurot qoldirgan o‘yinchi Abbosbek Fayzullayev bo‘ldi. Bu ro‘yxatga barqaror o‘yini uchun Igor Akinfeyevni ham qo‘shish mumkin. Ivan Oblyakov ham ozgina jonlandi.
“Zamin” yangiliklarini “Instagram”da kuzatib boring
