O‘zbekiston terma jamoasi sobiq futbolchisi, "Olimpik" bosh murabbiyi Timur Kapadze Eron bilan kechadigan uchrashuv oldidan terma jamoamizning imkoniyatlari, forslar bilan kechgan yodda qolgan bahs haqida fikrlarini bildirdi.
"Eron bilan ko‘p to‘qnash kelganmiz. Ularning bu tarkibi anchadan beri birga o‘ynamoqda. O‘tgan Jahon chempionatida ham shu futbolchilar qatnashgandi. Albatta, tajriba va mahorat tomondan ular kuchli. O‘ylaymanki, bizning kuchimiz yetadi. Yaqinda o‘rtoqlik uchrashuvida ham uchrashdik va yomon harakat qilmadik. Shomurodovda yuz bergan vaziyat, Ostonda ham imkoniyat bo‘ldi. Boz ustiga ayrim sabablarga ko‘ra murabbiy o‘shanda yo‘q edi. Agar biz birinchi gol urib olsak o‘yin boshqacha bo‘lardi.
Turkmaniston bilan o‘yin ruhiy tomonlama kerak edi. Maydon, mehmon kabi faktorlarga qaramasdan o‘z darajalarini ko‘rsatishdi. Yaxshi kayfiyatda tayyorgarlik ko‘rishadi, deb o‘ylayman. Bizning futbolchilar hozir yaxshi darajada. Legionerlar, mahalliy futbolchilar bilan Eronni yutishimizga ishonchim komil.
Albatta, futbolchilik faoliyatimda Eron bilan ko‘p o‘ynaganman. Eng esda qolarli bahs 2012 yil so‘nggi daqiqalardagi mag‘lubiyat hisoblanadi. Qarshi hujumda gol o‘tkazib yuborgandik. O‘sha siklda boshqacha tarkib va boshqa murabbiy bilan revansh olganmiz. Umuman olganda Eron bilan hech bir o‘yinda kuchsiz ko‘rinmaganmiz. Lekin qandaydir kichik vaziyatlar o‘yinni hal qilib ketgan. Kichik detallar natijaga ta’sir qilgan. Eron shunday omillar bilan natija qilib ketadi. Imkoniyatlarimizdan foydalansak, kerakli natijaga erisha olamiz", - deydi Timur Kapadze.
“Zamin” yangiliklarini “Youtube”da kuzatib boring
