Italiya A Seriyasida 15-tur uchrashuvlari davom etmoqda. Bu tur 11 dekabr kuni “Kalyari” va “Sassuolo” o‘yini bilan yakunlanadi.
Sardiniyaliklarning navbatdagi bellashuvlari oldidan statistika ekspertlari Eldor Shomurodovning golsiz seriyasi cho‘zilib ketganiga e’tibor qaratdi.
Italiya futbolini yoritib kelayotgan tuttomercatoweb.com sayti eksperti Paola Paskalis o‘zbek hujumchisi shu yilning aprelidan beri A Seriyada gol urmaganini ta’kidladi.
Sports.uz portali Eldor Shomurodov Rossiya Premer-ligasidan Italiya chempionatiga ko‘chib o‘tganidan keyin A Seriyada o‘zi o‘ynagan jamoalardagi debyut golini urish uchun nechta uchrashuv kerak bo‘lganini hisoblab chiqdi.
Demak, Shomurodov “Rostov”dan Italiyaning eng qadimiy klubi “Jenoa”ga 2020 yilning 1 oktyabr kuni ko‘chib o‘tgan. Eldor Genuya klubida darrov boshlang‘ich tarkibdan joy oldi. Legionerimiz kuchli beshlik chempionatlaridagi debyut o‘yinini 19 oktyabr kuni to‘rtinchi turdan o‘rin olgan “Verona”ga qarshi safar uchrashuvida nishonladi.
Shundan keyin Eldor uchinchi o‘yinida Italiyadagi birinchi golini urdi. 30 noyabrda Genuyada o‘tgan to‘qnashuvda “Parma” darvozasini ishg‘ol qildi. Demak, hamyurtimizga A Seriyadagi debyut goli uchun to‘rtta o‘yin kifoya qildi.
O‘sha mavsum Shomurodov uchun omadli bo‘ldi. Tajribali hujumchi milliy chempionatda 31 ta uchrashuvda maydonga tushib, raqiblar darvozasini sakkiz marotaba ishg‘ol qildi. Bu ko‘rsatkichlar katta klublarning e’tiboridan chetda qolmadi.
2021 yilning 2 avgust kuni “Roma” yangi bosh murabbiy Joze Mourino talabiga ko‘ra, “Jenoa”dan Eldor Shomurodovni 18 million yevroga transfer qildi.
Poytaxt klubida o‘zbek futbolchisining o‘yinida pasayish kuzatildi. Eldor “Roma” safidagi A Seriyadagi ilk uchrashuvini birinchi turda “Fiorentina”ga qarshi bahsda o‘tkazdi.
Hamyurtimiz Joze Mourino jamoasida zaxira o‘yinchisiga aylandi va o‘n bitta uchrashuvdan sakkiztasida zaxiradan o‘yinga qo‘shildi. Nihoyat, murabbiylar shtabi 7 noyabrga kelib, “Venetsiya”ga qarshi safar uchrashuvida Eldorni boshlang‘ich tarkibda maydonga tushirdi. Bunga javoban legionerimiz “bo‘rilar” safida chempionatdagi ilk golini urdi.
Umumiy hisobda, bu golni urish uchun Shomurodovga to‘qqizta o‘yin kerak bo‘ldi.
Eldor Shomurodov bora-bora “Roma”ga kerak bo‘lmay qoldi. 2023 yilning yanvarida rimliklar o‘yin amaliyotisiz qolib ketayotgan legionerni “Spetsiya”ga ijaraga berib yubordi.
30 yanvar kuni yangi jamoaga o‘tgani qayd etilgan Eldor “Spetsiya”dagi debyutini 5 fevral kuni bo‘lajak chempion “Napoli”ga qarshi o‘tkazdi. Hamyurtimizga yangi jamoasidagi birinchi va yagona golini urish uchun ikki oy vaqt kerak bo‘ldi.
Eldor “Spetsiya” tarkibidagi sakkizinchi o‘yinida “Salernitana” darvozasini aniq nishonga oldi. Shomurodov 2 apreldagi o‘sha supergoldan keyin A Seriyada hali biror marotaba gol ura olgani yo‘q.
Bungacha o‘zi o‘ynagan Italiya jamoalari – “Jenoa”, “Roma” va “Spetsiya”da o‘z hisobiga gol yozdirib qo‘yishni uddalagan hujuchimiz “Kalyari” safida ham debyut golini tezroq kiritishini kutib qolamiz.
Balki bu 11 dekabr kuni “Sassuolo”ga qarshi bo‘ladigan uchrashuvda yuz berar...
“Zamin” yangiliklarini “Facebook”da kuzatib boring
